भारतीय गायन रियालिटी शो 'इन्डियन आइडल १३' को उपाधि ऋषि सिंहले जितेका छन्।
आइतबार मुम्बईमा भएको फिनालेमा ऋषि सिंह इन्डियन आइडलको विजेता घोषित भएका हुन्। प्रतियोगितामा देबोस्मिता राय फर्स्ट रनरअप र चिराग कोतवाल सेकेन्ड रनरअप भए।
विजेता बनेका सिंहले इन्डियन आइडल १३ को ट्रफीसँगै २५ लाख भारू र एक कार उपहार पाए।
ऋषिले इन्डियन आइडल १३ उपाधि जितेसँगै आफ्नो खुशी साटेका छन्। ‘मैले इन्डियन आइडल १३ को उपाधि जिते भनेर विश्वास लागिरहेको छैन। मेरो लागि यो एक सपना पूरा हुन जस्तै हो। यस सिजनको विजेताको रूपमा मेरो नाम घोषणा भएपछि मेरो खुशीको सीमा छैन,’ उनले भने।
भारतीय सञ्चारमाध्यमका अनुसार ऋषि सन् २०१९ को इन्डियन आइडलमा पनि सहभागी भएका थिए। उक्त सिजनमा उनी चौथो राउन्डबाटै बाहिरिएका थिए।
