बलिउड अभिनेता ऋतिक रोशनको फिल्म 'वार २' मा दक्षिण भारतीय अभिनेता जुनियर एनटिआर अनुबन्धित भएका छन्।
उनी फिल्ममा अनुबन्धित भएको हिन्दी फिल्म बजार विश्लेषक तरण आदर्शले पुष्टि गरेका हुन्।
उनले समाजिक सञ्जालमा लेखेका छन्, ‘वार २ ऋतिक रोशन र जुनियर एनटिआर। उनीहरूले पहिलोपटक स्क्रिन सेयर गर्न लागेका हुन्।’
‘वार २’ यशराज फिल्म्सको स्पाइ युनिभर्सको फिल्म हो। यो फिल्म सन् २०२३ को अन्तिममा प्रदर्शन हुनेछ।
अयान मुखर्जीको निर्देशनमा बन्ने फिल्म ‘वार २’ मा ऋतिक र जुनियर एनटिआरसँगै टाइगर श्राफ, कट्रीना कैफ, दिशा पाटनीको मुख्य भुमिका रहनेछ। २०१९ मा आएको एक्सन फिल्म ‘वार’ बक्स अफिसमा सुपरहिट भएको थियो।
यशराज फिल्म्सले स्पाइ युनिभर्सका तीन फिल्म निर्माण घोषणा गरेको छ। ती हुन् ‘वार २’, ‘टाइगर ३’ र ‘टाइगर भर्सेस पठान’।
जनावरी २५ मा शाहरूख खान अभिनीत फिल्म ‘पठान’ प्रदर्शन भएको थियो। यो फिल्म सर्वाधिक कमाइ गर्ने हिन्दी फिल्म बनेको छ।
सिद्धार्थ आनन्दले निर्देशन गरेको फिल्म ‘पठान’ मा सलमान खान केमियो भुमिकामा देखिएका थिए।
सलमान खानको फिल्म ‘टाइगर ३’ पनि शाहरूख खानको केमियो भुमिका रहनेछ भने ‘टाइगर भर्सेस पठान’ मा दुवै अभिनेताको टकराव देख्न पाइनेछ।
