बलिउड अभिनेता ऋतिक रोशन र टाइगर श्राफको फिल्म 'वार' ले बक्स अफिसमा राम्रो व्यापार गरेको थियो।
फिल्मले राम्रो प्रतिक्रिया बटुलेसँगै सिक्वेलको घोषणा गरिएको थियो। यसैबीच फिल्ममा दक्षिण भारतीय अभिनेता जुनियर एनटिआर जोडिएको खबर बाहिरिएको थियो।
भारतीय सञ्चारमाध्यम नवभारत टाइम्सका अनुसार जुनियर एनटिआरले ‘वार २’ को प्रस्ताव अस्वीकार गरेका छन्। स्रोतका अनुसार उनले ‘वार २’ नगर्ने बताएका हुन्।
‘जुनियर एनटिआर दुई अभिनेता भएको फिल्मबाट बलिउडमा डेब्यू गर्दैनन्,’ स्रोतले भने।
‘वार २’ यशराज फिल्म्सको स्पाइ युनिभर्सको फिल्म हो।
अयान मुखर्जीको निर्देशनमा बन्ने फिल्म ‘वार २’ मा ऋतिक र टाइगरसँगै कट्रीना कैफ, दिशा पाटनीको मुख्य भुमिका रहनेछ। २०१९ मा आएको एक्सन फिल्म ‘वार’ बक्स अफिसमा सुपरहिट भएको थियो।
यशराज फिल्म्सले स्पाइ युनिभर्सका तीन फिल्म निर्माण घोषणा गरेको छ। ती हुन् ‘वार २’, ‘टाइगर ३’ र ‘टाइगर भर्सेस पठान’।
जनावरी २५ मा शाहरूख खान अभिनीत फिल्म ‘पठान’ प्रदर्शन भएको थियो। यो फिल्म सर्वाधिक कमाइ गर्ने हिन्दी फिल्म बनेको छ।
सिद्धार्थ आनन्दले निर्देशन गरेको फिल्म ‘पठान’ मा सलमान खान केमियो भुमिकामा देखिएका थिए।
सलमान खानको फिल्म ‘टाइगर ३’ पनि शाहरूख खानको केमियो भुमिका रहनेछ भने ‘टाइगर भर्सेस पठान’ मा दुवै अभिनेताको टकराव देख्न पाइनेछ।
