लोरेन्स बिश्नोई ग्याङबाट लगातार ज्यान मार्ने धम्की आएपछि बलिउड अभिनेता सलमान खानले बुलेटप्रुफ कार किनेका छन्। उनले सेतो रंगको निसान पेट्रोल एसयुभी कार किनेका हुन्।
भारतीय सञ्चारमाध्यम नवभारत टाइम्सका अनुसार यो कार भारतमा लन्ज भएको छैन। भारतमा उक्त कारको मुल्य ८० लाखदेखि १ करोडसम्म हुने अनुमान छ।
सलमानलाई बुलेटप्रुफ कार किन्ने सल्लाह सुरक्षा व्यवस्थापन टिमले दिएका हुन्। केही दिनअघि सलमानलाई धम्कीसहित इमेल आएको थियो। त्यसपछि मुम्बई प्रहरीले उनको सुरक्षा बढाएको थियो।
सलमान खान आगामी फिल्म ‘किसिका भाइ किसिका जान’ मा देखिनेछन्।
फरहाद सामजीले निर्देशन गर्ने फिल्ममा सलमानसँगै विन्केटेश, पूजा हेगडे, राघव जुयाल, सिद्धार्थ निगम, जस्सी गिल, शहनाज गिल, पलक तिवारीको अभिनय छ। यो फिल्मलाई सलमान खान र साजिद नाडियाडवालाले निर्माण गरेका हुन्।
यो फिल्म २१ अप्रिलदेखि प्रदर्शन हुँदैछ। यो फिल्मपछि उनी 'टाइगर ३' मा देखिनेछन्।
