अभिनेत्री श्रीदेवी यतिबेला आफ्नो फिल्म ‘मम’ को प्रचारमा व्यस्त छन्। बक्सअफिसमा रेकर्ड राख्न सफल फल्म ‘बाहुबली २’ मा उनलाई शिवगामीको भूमिकाका लागि प्रस्ताव गरिएको थियो। तर, उनले मानिनन्। यसपछि उक्त भूमिका राम्या कृष्णनलाई दिइयो र उनले यसले निकै राम्रोसँग निभाइन्।
‘बाहुबली २’ हिट भएपछि सबैलाई लागिरहेको थियो कि, आखिर किन श्रीदेवीले उक्त भूमिका स्वीकारिनन्? यसबारे फिल्म निर्देशक एसएस राजमौलीले पहिले नै जवाफ दिएका थिए। श्रीदेवीले फिल्मको लागि मागेको रकम निर्माताले दिन नसक्ने भएपछि उनको भूमिका राम्याको हातमा परेको थियो।
फिल्मका लागि श्रीदेवीले भारु ६ करोड मागेको बताइएको छ। राम्याले शिवगामीको भूमिकाका लागि २ करोड भारु पाएकी थिइन्।
यसबारे अहिले आएर श्रीदेवीले पनि राम्रो जवाफ दिएकी छन्। उनले अब बाहुबली २ का लागि आफूलाई आएको प्रस्तावका बारेमा कुरा गरेर केही फाइदा नभएको बताएकी छन्।
उनले भनिन्, ‘फिल्म बन्यो र अरु कुनै कलाकारले उक्त भूमिका निभायो। फिल्म बक्सअफिसमा सुपरहिट भयो। अब यी सबैका बारेमा कुरा गर्नुको के फाइदा?’
श्रीदेवीको फिल्म ‘मम’ जुलाइ ७ मा रिलीज हुँदैछ।