शाहरुख खान र अनुष्का शर्मा इम्तियाज अलीको नयाँ फिल्म 'जब ह्यारी मेट सेजल' मा फेरि सँगै देखिदैंछन्। उनीहरुले 'रब ने बनादी जोडी' र 'जब तक है जान' मा सँगै काम गरिसकेका छन्। अनुष्का 'रब ने बनादी जोडी' बाटै बलिउड प्रवेश गरेकी हुन्।
पुनः अनुष्कासँग काम गर्नेबारे शाहरुखले अनुष्कासँग आफ्नो अनौठो सम्बन्ध रहेको बताएका छन्। उनले भनेका छन्, 'अनुष्कासँग मेरो अनौठो सम्बन्ध छ। हामी एकअर्कालाई मनपराउँछौं। मसँग पहिलो फिल्म खेल्ने दिपीका पादुकोण, अनुष्कासँग मेरो अलग किसिमको नाता छ।'
उनले थपे, 'यो फिल्मका लागि पनि इम्तियाजले हामी (म र अनुष्का) लाई नै सोचिसकेका थिए। आनन्दले अनुष्कासँग ७ महिनादेखि कुरा गरिरहेका थिए र मैले पनि भर्खरै त हामीले सँगै काम गर्यौं भनेको थिएँ। आखिरमा उनी नै यो भूमिकाका लागि योग्य ठहरिन्। उनीसँग काम गर्न निकै रमाइलो हुन्छ।'
शाहरुखले आफूले निकै समयपछि प्रेमकथामा काम गर्न लागेको बताएका छन्।
सुरुमा रिङ र पछि रेहनुमा राखिने भनिएको यो फिल्मको नाम केही दिनअघि मात्र 'जब ह्यारी मेट सेजल' तोकिएको हो। यो फिल्म आगामी अगस्ट ४ मा रिलीज हुँदैछ।
