लकडाउनको कारणले व्यापार गुमाएर सिथिल बनेका केही हेलिकप्टर र एयरलाइन्सलाई सरकारले बिजनेस दिएको छ।
सामान्य अवस्थामा पनि पाइरहेका उनीहरुलाई सिमित ब्यापार दिइएको हो।
सरकारले विकास निर्माणका काम सुरु गर्ने निर्णय गरेसँगै देशका दुर्गम ठाउँमा निर्माणाधिन जलविद्युत आयोजनाको काममा हेलिकप्टरले सामग्री आपूर्ति गरिरहेका छन्।
सिम्रिक, कैलाश, मनाङ र डाइनेस्टी हेलिकप्टरले यस्तो काम गरिरहेका छन्। सिम्रिकका अपरेशन डाइरेक्टर रमेशमान बज्राचार्यकाअनुसार कम्पनीले अहिले केही आयोजनामा सामग्री आपूर्तिको काम गरिरहेको छ।
यसरी काम पाउँदा हेलिकप्टर अपरेटरहरुले एउटा हेलिकप्टर सञ्चालन गरिरहेका छन्। सामान्य अवस्थाको तुलनामा निकै सस्तो भाडामा उडान गरिरहेको उनले जानकारी दिए।
सामान्य अवस्थामा हेलिकप्टरले प्रतिघण्टा २४ सय अमेरिकी डलर लिन्छन्। तर अहिले त्यसको ६०/७० प्रतिशत पनि चार्ज नगरिएको कम्पनीहरुले जानकारी दिएका छन्। उनीहरुका अनुसार एउटा हेलिकप्टरकै लागि मासिक १ करोडसम्म खर्च लाग्छ। तर उडानबाट त्यही पाल्न पनि नपुग्ने उनीहरुको भनाइ छ।
त्यस्तै दुर्गम क्षेत्रमा उडान गरिरहेका एयरलाइन्सले खाद्यान्न तथा अत्यावस्यकीय वस्तुको ढुवानी गरिरहेका छन्। उच्च हिमाली क्षेत्र जहाँ सडक यातायातबाट ढुवानी सम्भव छैन त्यस्तो ठाउँमा उनीहरुले ढुवानी गरिरहेका छन्।
सीता, तारा तथा समिट एयरले खाद्यान्न चार्टर उडान गरिरहेका छन्। उनीहरुले एकतर्फी लोडमा सामान्य भाडामै उडान गर्दा ग्राउन्डेड भएको भन्दा पनि नोक्सानी धेरै भएको उनीहरुको गुनासो छ।
