अर्थमन्त्री डा युवराज खतिवडाले चकलेटमा आफैले बढाएको कर घटाएको बताएका छन्।
चालु वर्षको बजेट अघि चकलेटको कर जति थियो त्यति नै पारेको बताएका हुन्। संसदमा चलकेटमा कर घटाइएको भन्दै सांसदहरुले व्यावसायिक समूहलाई लाभ दिनका लागि ल्याइएको भन्दै अर्थमन्त्री खतिवडाको आलोचना गरेका थिए।
सांसदहरुको प्रश्नमा जवाफ दिंदै खतिवडाले आफैले बढाएको कर घटाएर पहिलेको जति बनाएको बताएका हुन्।
'चकलेटको कुरा बारम्बार उठाइरहनुभएको छ। यो २०७१ मा पनि ३० प्रतिशत नै थियो। ७२ पनि त्यही थियो। चालु वर्षको बजेटबाट हामीले ४० प्रतिशत गरेका थियौ। अन्त:शुल्क र भ्याट गर्दा ६६ प्रतिशत हुन गयो। खाद्य वस्तु हो। ६६ प्रतिशत किन भनेर पुरानै ३० प्रतिशतमा ल्यायौ' खतिवडाले भने,'यो भन्दा अगाडि ३० प्रतिशत राख्ने सबै अर्थमन्त्रीले कुनै समूहसँग खाएर गरेका हुन् र ? चकलेट पनि खाने कुरै हो। अखाद्य वस्तु होइन। चकलेट स्वास्थ्यका लागि हानिकारक हुने वस्तु पनि होइन। केही स्वास्थ्यलाई हानिकारक हुने वस्तुहरुमा अहिले पनि ४० प्रतिशत छ।'
