चार्टर्ड उडानको नाममा व्यापाक ठगी भएको भन्दै गुनासो आएपछि सरकारले छानविन समिति गठन गरेको छ। उक्त समितिले काम गरिरहेकै बेला चार्टर्डका नाममा चर्को शुल्क असुली जारी रहेको छ।
काठमाडौंमा रहेको सिरिन ट्राभल्सले चार्टर्ड गर्ने भनिएको जापान उडान आजका मितिसम्म निश्चित छैन। तर उक्त ट्राभल्सले विभिन्न एजेन्सीबाट जुन १४ का लागि भन्दै टिकट बिक्री गरिरहेको पाइएको छ।
केही समय पहिले नेपाल सरकारले जापान,हङकङ र दक्षिण जाने प्रक्रिया पुरा गरेका नेपालीलाई पठाउने र त्यसका लागि उडान अनुमति दिने नेपाल सरकारले निर्णय गरेको थियो।
सरकारको उक्त निर्णयपछि जापानमा अहिलेसम्म पनि उडान भइरहेको छ भने हङकङमा उडान सम्पन्न भइसकेको छ। दक्षिण कोरियाको उडान भने अन्यौलमा छ।
सरकारले निर्णय गरेपछि जापान र हङकङ जाने नेपालीहरुलाई लकडाउनको मौका छोपी अत्याधिक नाफा लिएर भाडा असुल गरेको भन्ने गुनासो आइरहेको छ।
यस्तै गुनासो आएपछि संस्कृति पर्यटन तथा नागरिक उड्डयन मन्त्रालयका सहसचिव शुरेश आचार्यको नेतृत्वमा छानविन समिति गठन भएको छ। उक्त समितिले तत्कालका लागि नेपालीलाई विदेश फर्काउने भनिएका कुनै पनि उडानलाई अनुमति नदिन निर्देशन दिएको छ।
त्यसैले जापानको उडानले अनुमति पाएको छैन। तर जुन १४ अर्थात् आजका लागि भन्दै व्यापक रुपमा टिकट बिक्री भइरहेको पाइएको छ।
संकटको बेला जान पाइन्छ कि भनेर आशमा रहेका नेपालीलाई भ्रममा पारेर जसरी पनि टिकट बिक्री गर्नु उचित नभएको स्वयम नेपाल एयरलाइन्सकै अधिकारीहरु बताउछन्।
सामन्यतया उडान अनुमति पाएपछिमात्र टिकेटिङ हुनुपर्ने हो। तरपनि एजेन्सीहरुले डेमो टिकट बनाएर बुकिङ लिएपनि संकटबेला भ्रम छर्नु राम्रो नभएको नेपाल एयरलाइन्सकी प्रवक्ता अर्चना खड्काले जानकारी दिइन्।
जापानमात्र होइन हङकङ, अमेरिका जस्ता गन्तव्यमा हुने उडानमा ट्राभल एजेन्सीहरुले अकुत नाफा राखेर भाडा असुले पाइएको छ।
सामन्यतया कुनै पनि जहाजको चार्टर्ड सम्झौता भएपछि कूल रकम एयरलाइन्सले तोक्छ। त्यसबाट एजेन्सीले २० प्रतिशत बढी नहुनेगरी भाडा तोक्नुपर्छ। गन्तव्य हेरी एजेन्सीले अतिरिक्त १० प्रतिशतसम्म एयरलाइन्सबाटै कमिसन पाउछन्।
यसो भएपनि एजेन्सीहरुले ४० प्रतिशतसम्म बढी नाफा राखेर भाडा असुल गरेको पाइएको छ।
यसबारेमा विभिन्न तथ्यहरु आएको र अध्ययनकै क्रममा रहेको सरकारी छानविन समितिका एक सदस्यले जानकारी दिए।
'यसमा व्यापारकै रुपमा लिएर अधिक नाफा लिइएको पनि पाइएको छ।कतिपयको स्वभाविक पनि छ। तर यसमा भएका कमजोरीहरु हामीले हेरिरहेका छौ'ती सदस्यले सेतोपाटीसँग भने।
'यदि काठमाडौंबाट जापानको नारिता जाने चार्टर्ट जहाजको भाडाको प्रति सिट हिसाब गर्दा औसत १ लाख १७ हजारसम्म पर्न जान्छ। यसमा बिजनेस क्लासको बढी हुने भएकाले प्रति सिट भाडा इकनोमी क्लासको एक लाख भन्दा न्यून हुनुपर्ने हो। तर यहाँ बजारमा १ लाख ५० हजारसम्म असुल गरेको पाइएको छ' समितिका एक सदस्यले सेतोपाटीसँग भने।
