कोरोना भाइरस महामारीका कारण संसारभरका व्यापार व्यवसाय ओरालो लागेका छन्। धेरैले नियमित आम्दानी गुमाएका छन्। लकडाउनको समयमा अधिकांस व्यवसायको आम्दानीको रेखा ओरालो लागेका बेला केहीले भने असमान्य बृद्धि गरेका छन्।
कोरोना भाइरस संक्रमण फैलिन नदिन भन्दै संसारका धेरै देशमा लागू भएको लकडाउनका बेला कतिपय व्यपार फस्टाएका छन्। नेपालमा पनि कोरोनाका कारण लाखौको रोजगारी गुमेको छ। हजारौ व्यवसायीको व्यापार ओरालो लागेको छ।
तर केही यस्ता व्यापार छन् जसको आम्दानीको रेखा भने उकालो लागेको छ। त्यसैमध्येको एक हो नेपएक्प्रेस।
लजिस्टिक(कार्गो )सेवाको व्यापार गर्ने यो कम्पनीको व्यापार लकडाउनको अवधिमा एक तह माथि उक्लिएको छ।
पाँच वर्षअघि स्थापना भएर दैनिक २ देखि ३ सय कार्गो ह्यान्डल गरिरहेको कम्पनीले लकडाउन भएदेखि यस्तो संख्या चार सय नाघेको र यो आफ्नालागि कोशेढुंगा भएको कम्पनीका संस्थापक तथा सञ्चालक संगम सिंहले बताए।
'हाम्रो व्यापारमा एकैपटक दैनिक कार्गो संख्यामा सय बढीको बढोत्तरी हुनुभनेको कोशेढुंगा हो। जुन सामन्य गतिमा गएको भए हामीलाई वर्षदिन बढी लागन्सक्थ्यो' सिंहले भने। उनको बुझाइमा लकडाउन तथा कोरोना महामारी नभएको भए उनले अहिले पाइरहेको दैनिक व्यापार एक वर्षपछि पाउने थिए।
पाँच वर्षअघि सामन्य लगानीमा स्थापना गरिएको कम्पनीले पछिल्लो समय प्रगति भने गरेकै थियो। देशभर एजेन्सी नियुक्त गरेर अन्तर्राष्ट्रिय कार्गोका लागि कार्गो जहाज नै चार्टर गर्न सुरु त गरिसकेको थियो।
'हामी बिगर पिक्चरमा जान खोजिरहेका थियौ। तर सकिरहेका थिएनौ। हाम्रा लागि यो लकडाउन साध्य बनेर आइदियो' सिंहले भने।
लकडाउन हुनुपहिले नै केन्द्रीय जनस्वास्थ्य प्रयोगशालसँग देशभरको भाइरस परीक्षणको नमुना संकलनको जिम्मा लिएर दैनिक कारोबार बढाएको कम्पनीले पछिल्लो समय उक्त काम नपाएपनि झन बढाएको छ। लकडाउनका कारण अनलाइन व्यापार बढेको र त्यसको आपूर्तिको काम यस्तै कम्पनीले पाउने भएकाले बढेको सिंहको भनाइ छ।
लकडाउन पछि पनि यस्तो व्यापार बढ्नेमा उनी विश्वस्त छन्।
राइड सेयर जस्तै आपूर्तिका लागि व्यक्तिगत सवारीलाई प्रयोगमा ल्याउनका लागि एप्लीकेशन समेत ल्याइसकेको कम्पनीले आगामी दिनमा बजार विस्तार गर्ने योजना बनाएको छ।
अहिलेसम्म कूल करोड जति लगानी भएको सञ्चालकहरुको भनाइ छ। तर यसको मोडालिटी अलि फरक छ। दैनिकजसो ८ गाडी ढुवानीका लागि परिचालन गर्ने कम्पनीसँग आफ्नो गाडी छैन। साझेदारी मोडालिटीको लगानी भएकाले यसको आफ्नै दायित्व न्यून छ। दैनिक दर्जनौ जनशक्ती परिचालन हुने यो कम्पनीका आफ्नै कर्मचारी भने २२ जनामात्र छन्।
