तुल्सीपुर बजारमा शुक्रबारदेखि नयाँ नियम लागू हुने भएको छ।
बजारका व्यापार व्यवसाय मध्यान्ह १२ बजेसम्म सञ्चालन गर्न पाइने भएको छ। अर्को व्यवस्था नभएसम्मका लागि शुक्रबारदेखि तुलसीपुरमा १२ बजेसम्म मात्रै बजार पसल सञ्चालन गर्न पाइने भएको हो।
बिहीबार तुल्सीपुर उपमहानगरपालिकामा बसेको सरोकारवालाको बैठकले त्यस्तो निर्णय गरेको हो। तर यसमा अत्यावश्यक सेवाहरु भने पूर्ववत अवस्थामै सञ्चालन हुने छन्।
बुधबार मात्रै जिल्ला प्रशासन कार्यालय घोराहीमा बसेको जिल्ला संकट व्यवस्थापन समितिले जिल्लाभर साँझ ५ बजेसम्म बजार खोल्न दिने निर्णय गरेको थियो। त्यो निर्णय भएको दोस्रो दिन नै तुलसीपुरमा छुट्टै नियम लागू गर्ने निर्णय भएको हो।
तुल्सीपुर उद्योग वाणिज्य संघ, इलाका प्रहरी कार्यालय तुलसीपुर, इलाका प्रशासन कार्यालय तुलसीपुर लगायत सरोकारवाला सबै पक्षको बैठकले यस्तो निर्णय गरेको हो।
तत्कालका लागि तुलसीपुर क्षेत्रमा कोरोना पोजेटिभको संख्या न्यून भएपनि संक्रमणको चुनौति यथावत रहेको हुँदा त्यसबाट जोगिन यस्तो निर्णय गरिएको नगरप्रमुख घनश्याम पाण्डेले जानकारी दिए।
बैठकले कोरोना संक्रमितको शव व्यवस्थापन गर्नका लागि स्थानको समेत छनौट गरेको छ।
त्यसका लागि तुलसीपुर १२ स्थित टरिगाउँ एयरपोर्टको पूर्वतर्फ उपमहानगरपालिकाले भाडामा लिएको जग्गा, वडा नं. १२ स्थित सिलतपुर शवदाह गृहको उत्तर तर्फको जग्गा र वडा नं. ७ स्थित गैराखाली सामुदायिक वनको खाली जग्गालाई छनोट गरिएको छ।
