नेपाल राष्ट्र बैंकले चालु वर्षका लागि ल्याएको मौद्रिक नीतिप्रति सकारात्मक प्रतिक्रिया दिएका छन्।
व्यवसायीहरुले मौद्रिक नीतिले आफूहरुले दिएका सुझावलाई ग्रहण गरेको बताएका छन्। कोरोनाका कारण ठप्प रहेको यो क्षेत्र अझै केही समय पहिलकै अवस्था पुग्ने सम्भावना नभएको भन्दै अधिकतम सहुलियतको माग व्यवसायीहरुले गर्दै आएका थिए।
गभर्नर महाप्रसाद अधिकारीले सार्वजनिक गरेको नीतिले कोरोनाबाट अति प्रभावित उद्योग व्यवसायको सूचीमा पर्यटन क्षेत्रलाई समावेस गरेको छ। यस्ता क्षेत्रलाई अधिकतम सहुलियत दिने नीतिमा उल्लेख गरिएको छ।
ऋणको भाका सार्ने, ३ प्रतिशतसम्म ब्याजदरमा ऋण उपलब्ध गराउने तथा चालु पुँजीमा सञ्चालन ऋण उपलब्ध गराउने जस्ता मौद्रिक नीतिमा उल्लेख गरिएका छन्।
यो नीतिबाट नेपालको पर्यटन क्षेत्रले राहत महसुस गरेको नेपाल वायुसेवा सञ्चालक संघका प्रवक्ता योगराज कँडेलले प्रतिक्रिया दिए।
'हामीले आउने चैतसम्म ऋणको किस्ता तिर्न सक्दिनौ भनेका थियौ। त्यो सम्बोधन गरेको छ। त्यस्तै सस्तो ब्याजदरमा ऋण दिनुपर्छ भनेका थियौ त्यो पनि आएको छ। यो नीति कार्यान्वयन भयो भने हाम्रो क्षेत्र सर्भाइव हुनसक्छ' कँडेलले भने।
त्यस्तै ठूलो लगानी भएको तथा प्रभावित भएको अर्को क्षेत्र होटल व्यवसायीहरुले पनि मौद्रिक नीतिले आफूहरुले राखेका मागलाई केही हदसम्म सम्बोधन गरेको प्रतिक्रिया दिएका छन्।
होटल संघ नेपालका वरिष्ठ उपाध्यक्ष बिनायक शाहले राष्ट्र बैंकले ल्याएको नीतिले धेरै कुरा सम्बोधन गरेको र यसको कार्यान्वयन जस्ताको तस्तै तत्काल हुनुपर्ने बताए।
'यसअघि भूकम्पको बेलाको जस्तो नीतिमा धेरै कुरा आउने तर कार्यान्वयन नहुने अवस्था आएमा त्यसको कुनै अर्थ हुनेवाला छैन। हामीलाई आजको भोलि नै ऋण चाहिएको छ कर्मचारीलाई तलब दिनका लागि। त्यसैले यसको कार्यान्वयन छिटो होस' शाहले भने।
