नेपाल वायु सेवा निगम (नेपाल एयरलाइन्स) ले आवश्यकता र औचित्यताको आधारमा तत्कालीन करार सेवामा कार्य गरेका कर्मचारीमध्येबाट व्यवस्थापन गर्ने नीति लिएको भन्दै अहिलेको कठिनाइप्रति धैर्यतापूर्वक सहयोग गरिदिन अनुरोध गरेको छ ।
निगम सञ्चालक समितिको आजको वैठकले सरोकारवाल सबै पक्षलाई अर्को व्यवस्था नहुञ्जेल सम्म निगमलाई परेको समस्या बुझिदिन आग्रह गरेको हो ।
निगमले कोभिड १९ को प्रभावले निगमको आन्तरिक तथा अन्तर्राष्टिय उडानमा प्रत्यस असर परी आर्थिक दायित्व बढेको तथा ऋण सहायताबाट खरिद गरेका जहाजको साँवा तथा ब्याज भुक्तानी गर्न समेत नसक्ने अवस्था आएकाले तत्कालीन करारमा कार्यरत जनशक्तिलाई निरन्तरता दिन नसकिएको स्पष्ट पारेको छ ।
करार सेवाका कर्मचारीको सम्झौता नविकरण नभएपछि विरोधमा उत्रिएपछि निगम बाध्यात्मक परिस्थितिलाई बुझिदिन आग्रह गरिएको निगमले आज जारी गरेको विज्ञप्तिमा उल्लेख छ ।
निगमले करार सेवाका १४५ कर्मचारीको साउनबाट सम्झौता नविकरण नगर्ने निर्णय गरेको थियो । निगमको सञ्चालक समितिको गत असार ३ गतेको वैठकले एम.एं ६० र वाई १२ ई विमान सञ्चालनमा नल्याउने निर्णय गरेको थियो । चीनबाट ल्याइएका ती छ वटै विमानको व्यवसायिक उडान बन्द गरेर नयाँ विमान खरिदगर्ने प्रक्रियामा निगम अघि बढेको छ ।
निगमको संगठन तथा व्यवस्थापन सर्वेक्षणको प्रतिवेदन निकट भविष्यमा प्राप्त हुने क्रममा रहेकोले उक्त प्रतिवेदन पश्चात निगमको जनशक्ति व्यवस्थापनको आँकलन हुने निगमले विज्ञप्तिमा उल्लेख गरेको छ ।
सरकारी स्वामित्वको निगमले आन्तरिक उडानलाई निरन्तरता दिनुपर्ने बाध्यता छ । निगमले दुर्गम क्षेत्रहरुमा रहेका नागरिकलाई भरर्दो र विश्वसनीय सेवा तथा सुविधा दिनका लागि निकट भविष्यमा उडानलाई अगाडि बनाउने निर्णय गरेको छ । निगमको भूमिस्थ सेवा र नियमित अन्तर्राष्टिय उडान सुरु भएपछि जनशक्ति व्यवस्थापनलाई आवश्यकताको आधारमा व्यवस्थापन गरिने पनि निगमले उल्लेख गरेको छ । - सिबी अधिकारी
