पर्यटनसँग सम्बद्ध व्यवसायीहरुले भदौ १६ पछि जसरी पनि यात्रा गतिविधि खुलाउन माग गरेका छन्। उनीहरुले संस्थागत रुपमै सरकारसमक्ष यस्तो माग गरेका हुन्।
पर्यटनसँग सम्बद्ध रहेका विभिन्न व्यावसायिक संघ संस्थाहरुले सरकारलाई पर्यटकीय गतिविधि खोल्न माग गरे पनि सरकारले भने झन् यात्रामा कडाइ गर्दै गएको छ।
भदौ १ गतेदेखि पर्यटकीय गतिविधि तथा यात्रा खुकुलो बनाउने पहिलाको निर्णय उल्ट्याउँदै सरकारले प्रतिबन्धलाई झनै कडा बनाएपछि व्यवसायीहरु सरकारसमक्ष यस्तो मागपत्र बोकेर गएका हुन्।
संघीय सरकारमात्र होइन स्थानीय सरकारहरुले समेत विभिन् ठाउँमा निषेधाज्ञा जारी गरेपछि पर्यटकीय गतिविध खुल्ने सम्भावना न्यून छ। संक्रमणको जोखिम बढीरहेको भन्दै सरकारले यात्रा गतिविधिमा कडाइलाई जारी नै राख्ने निर्णय गरेको छ।
लकडाउन नामलाई हटाएर लकडाउन गरेको सरकारका निर्णय सार्वजनिक गर्ने कार्यक्रममा बोल्दै अर्थमन्त्री डा युवराज खतिवडाले यात्रा गतिविधि खोल्ने समय नआएको प्रतिक्रिया दिएका थिए।
यो संकेत बुझेका व्यवसायीहरुले सरकारसमक्ष गतिविध खोल्न माग गरेका छन्। पछिल्लो समय यात्रा गतिविधिमा प्रतिबन्ध लगाएपनि अन्तर्राष्ट्रिय उडान गर्ने एयरलाइन्सहरुले उध्दार उडानको नाममा केही आम्दानी गरिरहेको भएपनि आन्तरिक उडान गर्ने एयरलाइन्स, होटल तथा अन्य व्यवसाय चैतदेखि शून्य आम्दानीमा चलिरहेको उनीहरुले बताएका छन्।
शून्य आम्दानीमा पनि चैतदेखि अहिलेसम्म जीवन निर्वाहका लागि केही तलब भत्ता उपलब्ध गराइरहेका व्यवसयीले अब पनि गतिविधि खुला नहुने हो भने रोकिने चेतावनी दिएका छन्।
'यस्तो अवस्थामा आयो भने यो क्षेत्रका लाखौ मजदुरहरु आम्दानी बिहिन हुनेछन्। व्यवसायीहरु ऋणले थिचिनेछन्। यस्तोमा आन्दोलनको बिकल्प हुनेछैन' पर्यटनसँग सम्बन्धित २० ओटा संस्थाहरुले सरकारलाई बुझाएको मागपत्रमा उल्लेख गरिएको छ।
