सयुक्त अरब इमिरेट्सबाट नेपालीलाई स्वदेश फर्किन रोकेको सरकारले टर्कीबाट भने आउन दिएको छ।
कोभिड-१९ व्यवस्थापन केन्द्र सिसिएमसीको निर्देशनअनुसार नेपाल एयरलाइन्सको जहाज टिकट काटेर दुबईमा तयार भएर बसेका २६० जना बढी नेपालीलाई नल्याएर रित्तै फर्कियो।
मंगलबारकै उडानमा टर्किस एयरले इस्तानबुलबाट भने २०१ जना यात्रु ल्याएर काठमाडौं आयो। त्रिभुवन अन्तर्राष्ट्रिय विमानस्थलका अनुसार नेपाल एयरलाइन्सको वाइडबडी जहाज मंगलबार बिहान ९:१२ बजे काठमाडौंमा अवतरण गरेको थियो।
जाँदा २ सय बढी यात्रु लिएर गएको जहाज फर्किंदा भने रित्तै फर्किएको थियो। यात्रु ल्याउनका लागि तयार भएर पनि सरकारले आदेशअनुसार जहाज खाली फर्किएको नेपाल एयरलाइन्सकी प्रवक्ता अर्चना खड्काले जानकारी दिइन्।
दिउसो २:४८ मा काठमाडौं अवतरण गरेको टर्किसको जहाजले भने २०१ जना वयस्क यात्रु तथा एक जना शिशुलाई ल्याएर आएको थियो।
त्रिभुवन अन्तर्राष्ट्रिय विमानस्थलका प्रवक्ता देवचन्द्रलाल कर्णले सरकारले आदेशबमोजिम नै टर्किसलाई यात्रुसहितको अवतरण अनुमति दिइएको जानकारी दिए।
भदौ १ देखि विदेशमा रहेका नेपालीलाई फर्काउनका लागि चार्टर्ड उडान गर्ने सकारको निर्णअनुसार नेपाल एयरलाइन्सलगायतले तालिका बनाएका थिए। सोहीअनुसार अगष्ट १७ मा दुबई गएर १८ मा काठमाडौं फर्किने तालिका थियो। त्यही क्रममा एयरलाइन्सले टिकेटिङ गरेको थियो।
तर अगष्ट १७ कै दिन बेलुका सिसिएमसीले तत्काल क्वारेन्टिन उपलब्ध नभएको भन्दै विदेशमा रहेका नेपालीलाई फर्काउने अभियान रोक्न निर्देशन दिएको थियो।
संस्कृति पर्यटन तथा नागरिक उड्डयन मन्त्रालय हुँदै जाने यस्तो निर्देशन सबै एयरलाइन्स तथा विमानस्थलमा पुगे पनि टर्किसका हकमा भने विशेष निर्देशन गएको विमानस्थल स्रोतले बतायो।
