पर्याप्त क्वारेन्टिन तथा आइसोलेसन व्यवस्था नभएको भन्दै उद्धार उडान स्थगित गर्न सिसिएमसीले दिएको निर्देशन उल्टिएको छ।
भदौ १ देखि उडान गर्ने पहिले निर्णय भएबमोजिम एयरलाइन्सहरुले उडान तालिका बनाइसकेका थिए। तर बीचमा आएर सिसिएमसीले रोक्न निर्देशन दिएको थियो।
तर सरकारले उद्धार उडान खोल्ने निर्णय गरेको छ। उडान कसरी गर्ने भनेर संस्कृति पर्यटन तथा नागरिक उड्डयन मन्त्रालयले छलफल गरेर निर्णय गर्ने छ। यस बारेमा अहिले मन्त्रालयमा छलफल भइरहेको एक उच्च अधिकारीले जानकारी दिए।
यसअघि उडानको तालिका बनाएर टिकेट काटिसकेका यात्रुका लागि फेरि उडान तालिका बनाउनका लागि सम्बन्धित एयरलाइन्सहरुलाई निर्देशन दिइसकिएको ती अधिकारीले जानकारी दिए। यद्यपि त्यसपछिका अरु उडानका सन्दर्भमा भने मन्त्रालयले तय गर्ने छ।
चार्टर्ड उडानमा भाडा धेरै भएको तथा टिकेटिङमा कालोबजारीसमेत भएको गुनासो आएपछि केही ठाउँमा नियमित उडान नै सुरु गर्ने संस्कृति पर्यटन तथा नागरिक उड्डयनमन्त्री योगेश भट्टराईको तयारी छ।
'धेरै नेपाली भएको ठाउँमा सम्भव भएसम्म सेप्टेम्बर १ देखि नियमित उडान गर्ने र बाँकी ठाउँमा चार्टर्ड उडान गर्ने मन्त्रीज्यू लगायत हाम्रो धारणा छ। त्यसअघि यसै पनि उडान खासै हुने छैनन्। तैपनि हुने अवस्थामा चार्डर्ड अनुमति दिनसकिन्छ' मन्त्रालयका एक उच्च अधिकारीले भने।
चार्टर्ड उडानको अनुमति दिने भनेर मन्त्रिपरिषदले निर्णय गरेपनि अहिलेसम्म विमानस्थल कार्यालयमा भने कुनै जानकारी पुगेको छैन।
विदेशबाट यात्रुसहित आउने उडानका लागि अनुमति दिनु भन्ने कुनै पनि निर्देशन वा परिपत्र विमानस्थलमा नपुगेका विमानस्थल प्रमुख देवेन्द्र केसीले जानकारी दिए।
