सरकारले विदेशमा स्वदेश फर्किने नेपालीको दैनिक कोटा बढाउने भएको छ। उडानका शर्तहरु पूरा गरेर आउने नेपालीलाई आउन दिने र सोही आधारमा उडान संख्या थप गरिने संस्कृति पर्यटन तथा नागरिक उड्डयन मन्त्री योगेश भट्टराईले जानकारी दिए।
पिसिआर परीक्षण नेगेटिभ भएका यात्रुहरुको मागको आधारमा उडान संख्या थप गर्दै जाने र यसरी आउँदा दिनमा ३ हजारसम्म आउने उनले बताए। नेपाल आर्थिक पत्रकार समाज(सेजनले) आयोजना गरेको वेबिनारमा बोल्दै भट्टराईले अब नेपाल आउन चाहने नेपालीहरुलाई सजिलो हुने जानकारी दिए।
' पछिल्लो समय संक्रमण केही बढेपछि सरकारले केही कडाइ गरेको थियो। तर पनि विदेशमा लाखौ नेपालीहरु स्वदेश फर्किन चाहनुभएको छ। यसका लागि उडान संख्या कम भयो भन्ने कुरा आएपछि हामीले सल्लाह गरेर उडान संख्या थप गर्ने र यसबाट दिनमा २५ सयदेखि ३ हजार नेपाली दैनिक फर्किन पाउने हाम्रो अनुमान छ' उनले भने।
यसअघि सरकारले दैनिक आठसयलाईमात्र ल्याउन दिने निर्णय गरेको थियो।
त्यस्तै कम्पनीहरुले निशुल्क ल्याइदिन चाहनेलाई पनि उडान अनुमति दिइने भट्टराईले जानकारी दिए। यसअघि इतिहात एयरवेजले दुबइबाट ११२० जना नेपालीलाई निशुल्क ल्याइदिने भन्दै उडान अनुमति माग गरेको थियो। तर सरकारले उसलाई उडान अनुमति अझैसम्म पनि दिएको छैन।
