नेपाल उ्योग वाणिज्य महासंघका वरिष्ठ उपाध्यक्ष शेखर गोल्छाले नेपाली अर्थतन्त्रमा मन्दीको संकेत देखिएको बताएका छन्। आजदेखि काठमाडौंमा सुरु भएको महासंघको ५४ औं साधारणसभालाई सम्बोधन गर्दै गोल्छाले अर्थतन्त्रमा मन्दीको संकेत देखिएको र यसलाई उकास्नका लागि सरकार र निजी क्षेत्रबीच कसिलो सहकार्य हुनुपर्ने बताए।
कोरोना महामारीका कारण बन्द भएका उद्योग व्यवसाय अझै पनि पूर्णरुपमा संचालन हुन नसकेको,लगानी, उत्पादन, बजारको माग र रोजगारी सबै क्षेत्रमा प्रभाव देखिएकाले अर्थतन्त्रमा मन्दीको संकेत देखिएको उनको भनाइ छ।
'अर्थतन्त्रमा करिब २३ प्रतिशत योगदान दिने र झण्डै २० लाखलाई रोजगारी दिइरहेका साना तथा मझौला उद्यमी अहिले निक्कै आक्रान्त भएका छन् । दुइ चार हजार रुपैयाँ दिएर उनीहरुले श्रमिकलाई गुजारा चलाउन सहयोग गरेका छन्। तर समय लम्बिँदै जाँदा त्यो पनि कठिन हुँदैछ । साना तथा मझौला उद्योग व्यवसाय,पर्यटन, यातायात, रियल स्टेट जस्ता क्षेत्रको उत्पादन ऋणात्मक हुन गएको अवस्था छ। यो प्रस्ट मन्दीको संकेत हो' उनले भने।
शनिबार हुने निर्वाचनपछिको कार्यसमितिमा स्वत: अध्यक्ष हुने गोल्छाले मन्दी तर्फ गएको अर्थतन्त्रको पुनरुत्थानका लागि सरकार र निजी क्षेत्रबीच बलियो र प्रतिफलयुक्त सहकार्य हुनु पर्ने उनको भनाइ छ।
विभिन्न अध्ययनहरुले लकडाउनको प्रभावबाट बाहिरिनका लागि सार्वजनिक खर्च परिचालन हुनुपर्ने बताएपनि सरकारले भने अहिलेसम्म कार्यक्रम घोषणा गरेपनि कार्यान्वयन गर्न नसकेको बताए।
आफू नेतृत्वमा आएपछि कोभिडको प्रभावबाट बाहिरिनका लागि गर्नुपर्ने कामका सन्दर्भमा ठोस कार्ययोजना बनाएको र त्यही आधारमा सरकारसँग सहकार्य गर्न आफूहरु तयार भएको उनको भनाइ छ।
कोरोना केन्द्रित राहत कार्यक्रम ल्याएर सरकारले व्यवसायको उद्धार गर्न जति ढिला हुन्छ क्षति त्यति बढ्दै जाने भएकाले सरकारले विशेष कदम चाल्नुपर्ने उनले बताए।
