मंसिरको तेस्रो साता हवाइ यात्रा गर्नेहरुको संख्यामा बृद्धि भएको छ। लकडाउन लगत्तै खुलेर दशै तिहार जस्ता चाडपर्वको भन्दा पनि राम्रो संख्यामा यात्रु पाइएको एयरलाइन्सहरुले बताएका छन्।
त्रिभुवन अन्तर्राष्ट्रिय विमानस्थल कार्यालयको तथ्यांकअनुसार पछिल्लो साता आन्तरिक उडान गर्ने एयरलाइन्सहरुका उपलब्ध सिटमध्ये ९५ प्रतिशत बढी भरिएका छन्।
सोमबारको तथ्यांकअनुसार यती एयरलाइन्सका उपलब्धमध्ये ९८ प्रतिशत सिट भरिएका(अकुपेन्सी) थिए। त्यस्तै श्रीको अकुपेन्सी ९७ प्रतिशत छ। बुद्ध एयरका उपलब्ध सिटमध्ये ९० प्रतिशत बढी सिट भरिएका थिए।
बुद्धले काठमाडौं विमानस्थलबाटमात्र दिनमा ८० भन्दा बढी उडान गर्दै आएको छ। त्यस्तै यतीले ४० उडान गरिरहेको छ भने श्रीले पनि तीन दर्जन बढी उडान गरिरहेको छ।
मंसिरमा विवाहको लगन भएकाले यात्रुको संख्या बढेको एयरलाइन्स सञ्चालकहरुको भनाइ छ। विवाहको मौसममा ओहोरदोहोर गर्दा सडक यातायातको साटो हवाइ यात्रा गर्नेहरुको संख्या पछिल्लो समय बढ्दा एयरलाइन्सलाई केही राहत मिलेको छ।
यद्यपी यो बृद्धि विवाहको लगन सकिएसँगै घट्ने यती एयरलाइन्सका प्रवक्ता सुदर्शन बर्तौलाको भनाइ छ। अहिले बढेको यात्रुको संख्याबाट एयरलाइन्सहरुलाई नाफा नभएपनि सञ्चालनका लागि नगद व्यवस्थापनका लागि सजिलो भएको उनको भनाइ छ।
