नेशनल ट्रेडिङ र खाद्य संस्थान गाभिएर बनेको खाद्य व्यापार कम्पनी लिमिटेडले नयाँ व्यापार योजना ल्याउने भएको छ।
यसअघि खाद्यको व्यवस्थापन गर्ने संस्था र व्यापार गर्ने नेशनल ट्रेडिङ गाभिएर बनेको नयाँ संस्थालाई व्यापारिक सोचसहितको योजना आवश्यक भएको भन्दै योजना ल्याउन लागिएको हो।
योजना तयार भइसकेको र अन्तिम हेरफरको काम रहेको कम्पनीका अध्यक्ष तथा वाणिज्य सचिव वैकुण्ठ अर्यालले जानकारी दिए।
कम्पनीलाई व्यापारिक संरचनामा लिने,संस्थागत संरचनाको हेरफेर लगायतका विषयमा नयाँ दिशा दिन खोजिएको अर्यालले जानकारी दिए।
'पहिले संस्थाको रूपमा रहेको थियो। तर अहिले व्यापार कम्पनी भएको छ। त्यसैले यसलाई हामीले त्यहीअनुसार ढाल्न खोजेका छौ' उनले भने।
अहिले तराई तथा धान उत्पादन हुने ठाउँमा किसानको धान खरिद गरी चामल बनाएर खाद्य कम्पनीले बिक्री वितरण गर्दै आएको छ। पहिले खाद्य संस्थानले गर्दै आएको कामलाई यसले निरन्तरता दिइरहेको हो।
अझै केही समय यसैगरी काम गर्ने भएपनि अब भने यो कम्पनीले व्यवस्थित आपूर्ति श्रृंखला सिर्जना गर्ने योजनामा उल्लेख गरिएको छ।
यसका लागि पहाडमा पनि उत्पादन भएका विभिन्न उत्पादनहरुलाई कम्पनीले खरिद गरी बिक्री हुने र आवश्यक भएका अन्य ठाउँमा लिएर वितरण गर्ने छ।
यसले गर्दा गाउँ गाउँमा भएका उत्पादनको बजारीकरणमा सहयोग पुग्ने सरकारी विश्वास छ।
नेपाल फुड ब्रान्डमा उत्पादन बजारमा पठाउने कम्पनीले आवश्यक परेका ठाउँमा बिक्री आउटलेट पनि खोल्ने छ।
यो सरकारी कम्पनीले निजी क्षेत्र नजाने ठाउँमा पनि जाने र जनतालाई सेवा दिने लक्ष्य लिएको छ।
यो कम्पनीको उद्देश्य निजी क्षेत्रसँग प्रतिस्पर्धा भन्दा पनि सन्दर्भ मूल्य कायम गर्न सहयोग गर्ने सचिव अर्यालको विश्वास छ।
'बजारको आकारमा यसको उपस्थिति ठूलो हुँदैन। फेरि यसले निजी क्षेत्रसँग प्रतिस्पर्धा गर्ने पनि होइन। जहाँ निजी क्षेत्रले व्यापार गर्न सक्दैन त्यहाँसम्म यो कम्पनी पुग्छ' उनले भने।
नजिकै गाउँमा उत्पादन हुने वस्तुहरू पनि बजारमा विदेशबाट आउने गरेका छन्। एकातिर किसानलाई बजारको ज्ञान नहुने अर्कोतिर पूर्वाधारको अभावले यस्तो हुँदै आएको छ।
यो व्यापार कम्पनीले किसानसँग उत्पादन भएका त्यस्ता वस्तुको खरिद गर्ने प्रतिबद्धतता जनाउनसक्यो भने स्थानीय उत्पादनको राम्रो बजारीकरणमा सहयोग पुग्ने छ।
कम्पनीले अहिले पनि हिमाली तथा पहाडी क्षेत्रका उत्पादन सिमीको दाल,फापरजस्ता उत्पादन ल्याएर बिक्रीवितरण गरिरहेको छ।
