सरकारी स्वामित्वको नेपाल एयरलाइन्सले आगामी १० वर्षका लागि व्यावसायिक योजना ल्याएको छ।
उडान तथा गैर उडानका लागि विभिन्न योजना ल्याएको एयरलाइन्सले लगानी तथा प्रतिफलको प्रक्षेपन पनि गरेको छ।
एयरलाइन्सले अबको १० वर्षमा ग्राउन्ड ह्यान्डलिङमा २७ अर्ब ३३ करोड रुपैयाँ लगानी गर्ने योजना बनाएको छ।
उडान बाहेकको यो सेवा राम्रो आम्दानी दिने मानिंदै आएको छ। सेवालाई प्रभावकारी तथा आधुनिक बनाउनका लागि भन्दै वर्षेनी लगानी थपिंदै लैजाने एयरलाइन्सले योजना बनाएको छ।
काठमाडौं,भैरहवा र पोखराका लागि एयरलाइन्सले यो लगानी गर्ने छ। पहिलो वर्ष सन् २०२१ मा काठमाडौंमा १ अर्ब २२ करोड लगानी गर्ने योजना बनाएको एयरलाइन्सले पोखरामा २९ करोड र भैरहवामा ४३ करोड लगानी गर्ने योजना बनाएको छ।
प्रत्येक वर्ष हुने आम्दानीसँगै लगानी पनि गर्दै लिने योजनाअनुसार सन् २०३० सम्म कूल २७ अर्ब ३३ करोड लगानी गर्ने एयरलाइन्सको योजना छ।
