प्रधानमन्त्री केपी शर्मा ओलीले प्रतिनिधिसभा विघटन गरेपछि विकसित राजनीतिक अवस्थाका बारेमा निजी क्षेत्रका प्रतिनिधमुलक संस्थाहरुले सयुक्त वक्तव्य मार्फत् राजनीतिक अस्थिरताबाट अर्थतन्त्रमा नकारात्मक प्रभाव पर्नेतर्फ सचेत गराएका छन्।
नेपाल उद्योग वाणिज्य महासंघ, नेपाल चेम्वर अफ कमर्स र नेपाल उद्योग परिसंघले सयुक्त वक्तव्य निकाल्दै चासो व्यक्त गरेका छन्।
नेपालको निजी क्षेत्र जहिले पनि राजनीतिक स्थिरताको पक्षमा रहेको र विगतमा पनि राजनीतिक स्थिरताका लागि वारम्वार सुझाव दिंदै आएको उनीहरुले स्मरण गराएका छन्।
'राजनीतिक स्थिरताबाट मात्र नीतिगत स्थिरता आउने, नयाँ नयाँ उद्योग, व्यवसाय फस्टाउने, रोजगारी सृजना हुने, नयाँ लगानी आकर्षण हुने र समग्रमा अर्थतन्त्रले गति लिनसक्ने यथार्थतालाई कसैले पनि भुल्न हुंदैन' विज्ञप्तिमा भनिएको छ।
कोरोना महामारीले यसै पनि थलिएको अर्थतन्त्रमा राजनीतिक अस्थिरताको कालो बादल लागेमा अवस्था भयावह हुनसक्ने तर्फ सबै सचेत हुनुपर्ने वक्तव्यमा उल्लेख गरिएको छ।
'राजनीतिक स्थिरताको आर्थिक विकाससंग प्रत्यक्ष सम्बन्ध रहने विगतको अनुभव हेर्दा अहिलेको कठिन परिस्थितिमा सिर्जित घटनाक्रमले अन्यौलता सृजना गर्नेमा निजी क्षेत्र सशंकित एवं चिन्तित भएको छ र भर्खरै चलायमान हुन थालेको मुलुकको अर्थतन्त्र र सर्वसाधारणको जिवीकोपार्जनमा समेत गम्भिर असर पर्नेमा हाम्रो चिन्ता छ' वक्तव्यमा उल्लेख गरिएको छ।
सम्पुर्ण राजनीतिक दलहरूलाई सुझबुझ र संयमतापूर्वक निर्णय लिई मुलुकलाई स्थिरतातर्फ लैजाने कार्यमा गम्भिर हुन निजी क्षेत्रले आग्रह गरेको छ।
