कोरोना कहरका कारण अर्थतन्त्रमा परेको असरले विभिन्न क्षेत्रमा रोजगारीका अवसर खुम्चिएको छ। यससँगै राइड सेयरिङ प्लाटफर्म ‘पठाओ’मा काम गर्नेको संख्या बढेको छ। दैनिक अनलाइन तालिम लिएर दर्ता गर्नेको संख्यामा वृद्धि आएको पठाओ कम्पनीले बताएको छ।
रोजगारीको ढोका खुल्ला राख्न पठाओले दैनिक ‘पठाओ राइडरका लागि आधारभुत तालिम’ अनलाइनमार्फत नै सन्चालन गर्दै आएको पठाओ नेपाल प्रालिद्वारा जारी विज्ञप्तिमा उल्लेख छ।
कोरोना कहरअघि कार्यालयमै सन्चालन हुँदै आएको तालिम हाल स्वास्थ्य सुरक्षाको सावधानी अपनाउन अनलाइन मार्फत सन्चालन गरिएको हो।
जारी विज्ञप्तिअनुसार कोरोना समयअघि दैनिक एक सय राइडरले आधारभुत राइडर तालिम लिएर पठाओ सेवा सुरु गर्थे। अहिले दैनिक दुई सय राइडर पठाओमा जोडिँदै आएका छन्।
पठाओमा कसरी जोडिने?
सुरुमा मध्य बानेश्वरमा रहेको पठाओको कार्यालयमा गएर नाम र फोन नम्बर दर्ता गराउनु पर्छ। त्यसपछि मोबाइलमा एसएमएसमा मार्फत अनलाइन तालिमको लिङ्क प्राप्त हुन्छ। सो लिङ्क खोलेर तोकिएको समयमा तालिम लिन सकिन्छ।
सिकेवल नेपाल प्रालीले सहजीकरण गर्ने अनलाइन तालिम करिब १ घण्टा अवधिको हुनेछ। तालिममा पठाओ एप चलाउन, दर्ता प्रक्रिया र डकुमेन्ट अपलोड गर्न सिकाइन्छ। ग्राहकसँग गर्नुपर्ने व्यबहार र इन्स्योरेन्स पोलिसीबारे र राइडका क्रममा आइपर्ने समस्या समाधानका उपाय र कम्पनीको नियमका विषयमा सुझाइन्छ।
दिनमा २ पटक सन्चालन हुँदै आएको तालीम बिहान ८ बजे र दिउँसो साँढे २ बजे लिन सकिने कम्पनीको भनाइ छ। हप्तामा सातै दिन हुने तालिम सनिबार बिहान मात्र र आइतबार दिउँसो मात्र सन्चालन हुँदै आएको छ।
तालिमपछि राइडरले पठाओ एपमा आवश्यक कागजात (नागरिकता, ब्लु बुक, सवारी चालक अनुमति पत्र) अपलोड गर्नु पर्ने हुन्छ। पारिवारिक सदस्यको नाममा भएका र फाइनान्स गरिएका बाइक पनि प्रयोग गर्न सकिन्छ।
कागजात अपलोड गरेको तीन दिन भित्रमा पठाओले भेरिफाइड गरेपछी राइडरले काम सुरु गर्न सक्छन्।
