तारा एयरलाइन्सले पोखरा-जोमसोम नियमित उडान पुन: सुरु गरेको छ। करिब दुई महिनापछि नियमित उडान सुरु गरिएको एयरका प्रवक्ता सुदर्शन बर्तौलाले जानकारी दिए।
यसअघि कोभिड महामारीका कारण उडान बन्द भएको थियो। गत डिसेम्बर २० बाट बन्द भएको उडान आजबाट पुनः सुरु भएको हो। अब नियमित उडान हुने प्रवक्ता बर्तौलाको भनाई छ। उनका अनुसार एयरले आज पाँच उडान गरेको हो। यसअघि पनि सामान्य अवस्थामा ताराले पोखरा-जोमसोम दैनिक पाँच उडान गर्दै आएको थियो।
‘अब नियमित दैनिक पाँच उडान हुन्छ। आज पाँचै उडानमा यात्रु पूर्ण क्षमतामा थिए,’ उनले सेतोपाटीसँग भने। कोभिड सामान्य बन्दै गएका कारण बुकिङ उत्साहजनक भइरहेको उनले बताए।
