कास्कीका विनोद ओझा सन् २००९ मा बेलायत पुगे। १ वर्षपछि बेकरीका परिकार बनाउने तालिम लिएर उनी २०११ मा नेपाल फर्किए। त्यसपछि उनले बेकरीको काम सुरू गरे।
‘नयाँ केही गरौं भन्ने थियो अनि त्यसैमा के गर्ने त भन्दा फुड इन्डस्ट्रीमा काम गर्न मन थियो। घरमा पनि खाना पकाउन निकै मन लाग्थ्यो। के गर्नेभन्दा बेकरी इन्डस्ट्रीमा लागेको हो,’ उनले भने, ‘बेलायतमा बेकरीको तालिम लिएर आएपछि आफैंले बेकरी सुरू गरेको हो। अहिले बेकरीको सबैजसो परिकारहरू बन्छ।’
उनले बेकरी परिकार बनाउनका लागि कच्चा पदार्थ फ्रान्सबाट ल्याउँछन्। बेकरीका लागि प्रख्यात भएकाले फ्रान्स उनको रोजाइमा परेको हो। फ्रान्सका साथै इटाली, बेलायतसहित युरोपका विभिन्न देशबाट उनले आवश्यक कच्चा पदार्थ मगाउँछन्।
लगानीकर्ता भए पनि उनको ध्यान काउन्टरभन्दा किचनमा हुन्छ। उनी किचनमै खटिन्छन्। उज्यालो नहुँदैदेखि नसुतेसम्म पनि किचनमै काम गर्छन्। गुणस्तरीय परिकार बनाएकै कारण उनलाई बेकरी बेच्न समस्या छैन। ६० लाखबाट सुरू गरेको उनको व्यवसायमा अहिले ३ करोडभन्दा धेरै लगानी भइसकेको छ।
‘सुरूमा ६० लाख लगानी गरेको हो। अहिले ३ करोड नाघेको छ। बसुन्धरामा दुई ठाउँमा छ, पुल्चोकको लबिङ मल र पोखरामा पनि शाखा छन्। पोखरामा भने अरूसँगको साझेदारीमा स्थापना गरेको हो,’ उनले भने,‘म किचनमा धेरै व्यस्त हुन्छु। किनकी मलाई गुणस्तर बिग्रिन्छ कि भन्ने चिन्ता धेरै लाग्छ। संसारकै नम्बर वान चकलेट, नौनी, पीठो प्रयोग गर्छौं। मलाई बजारको कुनै दुःख छैन।’
विनोदले आफ्नो बेकरीलाई ब्रान्ड बनाउनसमेत लागेका छन्। उनले ब्रो बेकरीलाई ब्रान्ड बनाउँदै छन्।
‘ब्रो बेकरीलाई मैले ब्रान्ड बनाउँदैछु। यो ब्रान्ड भइसकेको छ। मैले यो नाम राख्नुको कारण छ। ब्रो भन्ने क्याची पनि भयो। अर्को विनोद रञ्जना र ओझा आउने भएर पनि हो,’ उनले भने। रञ्जना उनकी श्रीमतीको नाम हो।
बेकरी बनाउँदा तापक्रमदेखि सबै चीजमा ध्यान दिनुपर्ने उनको भनाइ छ। किचनलाई हाइजानिक बनाउन उनी सचेत छन्। हरेक परिकारको पाक्ने तापक्रम आ-आफ्नै हुने उनले बताए। विनोदका अनुसार कुनै परिकारको लागि धेरै तापक्रम चाहिन्छ भने कुनैको लागि माइनस तापक्रम चाहिन्छ।
सबै सामग्री फ्रान्सबाट मगाउन उनलाई गाह्रो भइरहेको छ। अहिले बाहिरको सामान आउन पनि कडाइ गरेकाले कठिन भएको हो। जसोतसो काम गरिरहेका छन्। जस्तोसुकै कठिन अवस्थामा पनि उनको बटमलाइन गुणस्तरीय बेकरी नै हो।
‘बजारमा खानै नहुने सामान पनि छन्। कम गुणस्तरको सामान बनाउन मेरो मनले मान्दैन। त्यसैले पाएसम्म गुणस्तरीय सामग्री प्रयोग गर्छु,’ उनले भने,‘काम गर्न सकिएन भने बरू बन्द गर्छु तर गुणस्तरमा सम्झौता गर्दिनँ। आजभन्दा भोलि, भोलिभन्दा पर्सि राम्रो अनि गुणस्तरीय सामग्री बनाउने भन्ने मेरो सिद्धान्त हो।’
उनको बेकरीमा यति ठूलो प्यासन छ कि एक महिनाअघि एक्लै फ्रान्स गएर १० दिने कोर्स सिकेर आए।
‘एक महिना पहिला पेरिस गएर संसारकै राम्रा मानिने सेफहरूसँग बेकरीको तालिम लिएर आएको हो। १० दिनको प्राइभेट कक्षा लिएको हो। फुड इन्डस्ट्रीमा नयाँ-नयाँ इनोभेसन भएको छ। त्यो सिकेर आएको हो,’ उनले भने,‘फ्रान्सलाई बेकरीको हब मानिन्छ। त्यसैले त्यहाँको तरिका सिक्न जरूरी छ।’
इमान्दार भएर काम गर्ने अनि गुणस्तरमा सम्झौता नगर्ने हो भने एकदिन ग्राहकले खोज्दै आउने उनको अनुभव छ। आफ्नो जस्तै स्वास्थ्य अरूको पनि सम्झेर काम गर्नुपर्ने उनको सुझाव छ।
उनले आफ्नो ब्रान्च अष्ट्रेलियाको सिड्नीमा समेत सुरू गर्ने तयारी गरेका छन्। त्यसका लागि रिसर्च गर्न त्यसतर्फ जाने तयारी गरेको उनले बताए।
हेर्नुहोस् भिडिओ
