तेस्रो टी–२०मा न्युजिल्यान्डलाई ६ रनले हराउँदै शृंखलामाथि भारतको कब्जा

एजेन्सी

नयाँ दिल्ली, कात्तिक २२

न्यूजिल्याण्डलाई ६ रनले हराउँदै भारतले टि–२० शृंखला २–१ ले जितेको छ। मंगलबार राति भएको रोमाञ्चक खेलमा भारतले भ्रमणकारी न्युजिल्यान्डलाई पन्छाउँददै उपाधि जितेको हो।

वर्षाको कारण ढिला सुरु भएको खेल ८ ओभरमा छोट्टाएको थियो । ओभर छोट्टाएको खेलमा टस हारेर भारतले पहिले ब्याटिङको निम्तो पायो। भारतले पुरै ८ ओभर खेल्दै ५ विकेटको क्षतिमा ६७ रन बनायो। भारतका मनिष पाण्डेले १७ तथा हार्दिक पाण्डयले अविजित १४ रन बनाए। त्यस्तै कप्तान बिराट कोहलीले १३ रन बनाए। न्युजिल्यान्डका इश सोधी र टिम साउथेले समान २ – २ विकेट लिए ।

भारतले दिएको ६८ रनको लक्ष्यसहित जवाफी ब्याटिङ थालेको न्युजिल्यान्डले पुरै ओभर खेल्दै ६ विकेट गुमाएर मात्र ६१ रन बनाउन सक्यो। न्युजिल्यान्डका कोलिन डी ग्रान्डहोमले अविजित १७ तथा ग्लेन फिलिप्सले ११ रन बनाउनु बाहेक अन्य ब्याट्सम्यानले उल्लेख रन जोड्न सकेनन्।

भारतको जितमा यजुवेन्द्र चहल र जसप्रित बुमराहले नायक सावित भए। उनीहरुले उत्कृष्ट बलिङ गरे। यजुवेन्द्रले २ ओभरमा ८ रन मात्र खर्चे। बुमराहले २ ओभरमा ९ रन खर्चेर २ विकेट लिए।

बुमराह यो खेलका उत्कृष्ट खेलाडी र पुरै शृ‌खलाको उत्कृष्ट खेलाडीसमेत भए।