मलेसियामा जारी एसिसी यू–१९ एसिया कपमा नेपालले भारतमाथि ऐतिहासिक जित हात पारेको छ। नेपाली कप्तान दीपेन्द्र सिंह ऐरीको अलराउण्ड प्रदर्शनले मलेसियाको बायुमास ओभलमा भएको खेलमा नेपालले भारतलाई १९ रनले हराउँदै इतिहास रचेको हो।
नेपालले भारतलाई क्रिकेटको कुनै पनि प्रतियोगितामा पराजित गरेको यो पहिलो पटक हो।
यसअघि नेपालले दिएको १ सय ८६ रनको लक्ष्य पछ्याएको भारत ४८.१ ओभरमा १ सय ६६ रन बनाएर अलआउट भयो।
भारतलाई रोक्न नेपाली कप्तान ऐरीले १० ओभर बलिङ गर्दै २ मेडन राखेर ४ विकेट लिए। नेपालका लागि उनले १०१ बल खेल्दै ८८ रनसमेत बनाएका उनी म्यान अफ द म्याच समेत भए। आजको खेल नेपाललाई दिलाउन महत्वपूर्ण भूमिका निभाएका उनी ४ वर्षअघि महेन्द्रनगरबाट युथ–१९ प्रतियोगितामा सहभागी हुन काठमाडौं आउँदा दीपेन्द्रसिंह ऐरीको परिचय एउटा समान्य खेलाडीको थियो। उनलाई त्यतिबेला लागेको पनि थिएन, आफू युथ–१९ राष्ट्रिय टोलीको सदस्य बन्छु भन्ने।
उनको ब्याटिङ ठीकै थियो। मध्यक्रममा हल्का बल घुमाउँथे। आखिर उनको उमेर कति नै थियो र, त्यतिबेला! १५ वर्ष पनि काटेका थिएनन्।
तर, यति फुच्चे उमेरमा पनि उनको एउटा विशेषता थियो, आक्रामक क्षेत्ररक्षण गर्थे। एक प्रकारले भन्नु पर्दा– जबरदस्त फिल्डर।
राष्ट्रिय टोलीका प्रशिक्षक जगत टमाटाले दीपेन्द्रलाई १४ वर्ष १० महिनाको उमेरमा युथ–१९ टिममा स्थान दिनुमा धेरै हदसम्म उनको आक्रामक फिल्डिङ नै कारण थियो।
जगतको सोच थियो– मध्यक्रममा दीपेन्द्रले २०–२५ रन मजाले बनाइ हाल्छन्! फिल्डिङबाट पनि उनी २०–२५ रन रोक्न पोख्त छन्। त्यसैले टिममा उनको योगदान ५० रनको हाराहारीमा हुन सक्छ।
प्रशिक्षक टमाटाको यही लोभ र भरोसाका कारण सन् २०१४ मा युथ टिममा समावेश भएका दीपेन्द्रले तीन वर्षको छोटो अवधिमै नेपाली क्रिकेटको स्टार खेलाडी बन्ने झझल्को दिएका छन्।
छोटो समयमा सनसनी मच्चाए राष्ट्रिय टिममा उत्कृष्ट प्रदर्शन गरेका ऐरीलाई युवा टोलीको नेतृत्व दिइएको थियो।
आफूलाई दिएको जिम्मेवारी निभाउने क्रममा यसअघि यु १९ एसिया कप पूर्वी क्षेत्रबाट विजयी बनाउँदै एसिया कपमा नेपाललाई पुर्याएका ऐरीले एसिया कपको पहिलो खेलमा टेष्ट राष्ट्र बंगलादेशविरूद्ध उत्कृष्ट प्रदर्शन गरे। अन्तिम ओभरमा बंगलादेशलाई रोक्न नसक्दा हार बेहोरेको नेपालले अर्को एसियाली महारथी भारतलाई पन्छाउँदै एसियामा आफ्नो उपस्थिति बलियो बनाएको छ। जसको श्रेय कप्तान ऐरीलाई जान्छ।
उनले आज भारतविरूद्ध ब्याटिङमा जुन ‘क्लास’ देखाए, यसले उनी नेपाली समर्थकको प्रिय बन्ने कुरामा शंका छैन्। भारतीय तीब्र ‘पेस अट्याक’ लाई निस्तेज पार्दै दीपेन्द्रले १०१ बलमा २ छक्का र ६ चौकाको सहयोगले ८८ रन बनाए।
जतिबेला नेपाल २८ रनको अवस्थामा २ विकेट गुमाएर १० ओभर खेलिसकेको थियो। उनले जितेन्द्र सिंहसँग ४९, रोहित पौडेलसँग २८, भीम सार्कीसँग १९ , कमल सिंह ऐरीसँग ३१, पवन सरार्फसँग ५ र किशोर महतोसँग १२ रनको साझेदारी गर्दै टिमलाई मध्यम स्कोर बनाउन सफल भए।
सन् २०१४ को नोभेम्बरमा कुवेतमा भएको एसिसी युथ–१९ प्रिमियर लिगबाट जुनियर क्रिकेटमा ‘डेब्यू’ गरेका दीपेन्द्रले आफू कप्तान हुनुको परिचय दिएका छन्।
डेब्यु खेलमा आठ नम्बरमा ब्याटिङ गर्न गएका उनले पुरै प्रतियोगितामा ५७ को औसतले १ सय १४ रन बनाउँदै आफूमा फिल्डिङ मात्र होइन, ब्याटिङको पनि अपार सम्भावना भएको पुष्टी गरे। उनले त्यतिबेला कुवेतविरूद्ध आठ नम्बरमा ब्याटिङ गर्दै २० बलमा बनाएको ४८ रन अहिले पनि सायदै कसैले भूलेको होलान्!
४ छक्का र २ चौकाको सहयोगले करिब अर्धसतकको नजिक पुगेका दीपेन्द्र त्यतिबेला दूर्भाग्यवस रनआउट हुन पुगेका थिए। उनको यो इनिङले प्रशिक्षक टमाटाको मन पुरै जितेको थियो।
उनै टमटालाई भर गर्दै यु १९ का प्रशिक्षक विनोद दासलाईसमेत उनले खुसी बनाएका छन्।
त्यसैले उनलाई सन् २०१५ मा मलेसियामा भएको यही प्रतियोगितको अर्को संस्करणमा छैठौं नम्बरमा व्याटिङ गर्न पठाइएको थियो। यतिबेला पनि उनी प्रतियोगितामा नेपालको तर्फबाट सर्वाधिक रन (३ इनिङमा १ सय १५) बनाउने व्याट्सम्यान बन्न पुगे। उनले कुवेतविरूद्ध नै समूह चरणको महत्वपूर्ण खेलमा ३४ रनमा ५ विकेट गुमाइसकेको अवस्थामा नेपाली टोलीको उद्दार गरे। उनले त्यतिबेला २ छक्का र १ चौकाको सहयोगले ८५ रन बनाएका थिए।
उनको दिनहुँ जस्तो परिस्कृत हुँदै गइरहेको खेललाई बुझेर प्रशिक्षक टमाटाले युथ टोलीमा थुप्रै स्टार खेलाडीको जमघट हुँदा हुँदै सन् २०१६ को युथ–१९ विश्व कप र एसिया कपमा १६ वर्षका दीपेन्द्र माथि जुवा खेलेका थिए।
सन् २००० को विश्वकप पछि पहिलो पल्ट सुपर–८ मा प्रवेश गरेको विश्वकपमा दीपेन्द्रले ब्याटिङबाट खासै प्रभाव जमाउन सकेनन्। तर, उनले ७ विकेट लिँदै बलिङबाट केही प्रभाव देखाए, जुन उनको अलराउन्डर बन्ने संकेत पनि थियो।
तर, युथ विश्वकपमा ब्याटिङमा ‘फ्लप’ भएका दीपेन्द्रले एसिया कपमा भने श्रीलंकाविरूद्ध सनसनीखेज व्याटिङ गरे। टेस्ट राष्ट्र श्रीलंकाको युवा टोलीविरूद्ध पाँचौ नम्बरमा व्याटिङ गर्ने क्रममा उनले १ छक्का र ९ चौकाको सहयोगले ९० रन बनाउँदै राष्ट्रिय टोलीमा आफू आउन लालायित रहेको आभाष दिलाए। उनले यही प्रतियोगितामा भारतजस्तो सशक्त टिमविरूद्ध पनि ३४ रन हानेका थिए।
दीपेन्द्रको यही प्रतियोगिताको उत्कृष्ट प्रदर्शनका कारण छनोट समितिले उनलाई हालको राष्ट्रिय टोलीका उत्कृष्ट ‘क्लोज फिल्डर’ रूपमा लिएको छ। प्वाइन्ट र कभर क्षेत्रमा उनको निपूर्णता खारिएको छ।
उनको खारिएको प्रदर्शनले नेपाली क्रिकेटमा अझै आशा जगाएको छ।
https://www.facebook.com/setopati/videos/1652199854850581/
