श्रीलंकाविरूद्ध सोमबारको दोस्रो टेस्ट म्याचमा भारतलाई जिताउन महत्वपूर्ण भूमिका निभाउँदै नयाँ रेकर्ड बनाएका रविचन्द्रन आश्विनले आफ्नो करियरमा ३०० टेस्ट विकेट पुरा गरेका छन्।
सबैभन्दा कम खेलमा ३०० विकेट लिने खेलाडी बनेका आश्विनले आफ्नो रेकर्डलाई दोब्बर बनाउने जनाएका छन्।
विदर्भ क्रिकेट संघ स्टेडियममा सोमवारको खेलपछि आश्विन ५४ टेस्टबाट ३०० विकेट लिने पहिलो खेलाडी बनेका छन्।
आश्विनले अस्ट्रेलियन खेलाडी डेनिस लिलीको रेकर्ड पछाडि छोडेका हुन्। लिलीले ५६ टेस्टबाट ३०० विकेट पुरा गरेका थिए।
‘म बाचा गर्छु। यो ३०० विकेटको उपलब्धिलाई ६०० विकेट पुर्याएरै छोड्नेछु,’ उनले भने, ‘मैले अहिले केबल ५४ टेस्ट मात्रै त खेलेको छु। स्पिन बलिङ देखिएपजि सहज पनि हुन्न।’
भारतीय टीमले विदर्भ क्रिकेट संघ स्टेडियममा खेलेको दोस्रो टेस्ट म्याचमा श्रीलंकालाई एक पारी र २३९ रनले हराएको थियो। यो टेस्टमा आश्विन जम्मा आठ विकेट लिएका थिए।
यति मात्र नभएर आश्विनले सबैभन्दा चाडो ३०० विकेट लिने भारतीय खेलाडी अनिल कुम्लेको रेकर्डसमेत तोडेका छन्। कुम्लेले ६६ खेलबाट ३०० विकेट पुरा गरेका थिए। जो आश्विनले ५४ खेलमै पुरा गरे।
