सिजनको बिग ब्यास लिगमा यसअघि लगातार तीन खेलमा विकेटविहीन बनेका नेपालका लेग स्पिनर सन्दीप लामिछानेले बुधबार भने तीन विकेट लिन सफल भएका छन्।
बुधबार मेलवर्न रेनेगेड्सविरूद्धको खेलमा होबार्ट हरिकेन्सका बलर सन्दीपले तीन विकेट लिएका हुन्। उनले ३.५ ओभर बलिङ गर्दा ३२ रन खर्चिए। ३ बल डट फ्याँकेका सन्दीपले २ चौका र १ छक्का दिए।
सन्दीपले मेलवर्नका जेक फ्रासर म्याकगुर्कलाई २१ रन, मोहमद नाबीलाई २ रन र जाहिर खानलाई ३ रनमा आउट गरे। सन्दीपले आठौं ओभरमा म्याकगुर्क र नाबीलाई आउट गरेका थिए।
खेलमा सन्दीप आबद्ध हरिकेन्सले ८५ रनको जित निकाल्यो। पहिले ब्याटिङ गरेको हरिकेन्सले ५ विकेटको क्षतिमा २०६ रन जोडेको थियो। उसका लागि बेन म्याकडरमोटले १२७ रन जोडे।
२०७ रनको लक्ष्य पछ्याएको मेलवर्न १५.५ ओभरमा १२१ रनमा अलआउट भयो। बलिङमा हरिकेन्सका सन्दीप र टम रोजर्सले ३-३ विकेट लिए।
जारी सिजनमा सन्दीपले ७ खेल खेल्दा ५ विकेट मात्र लिन सफल भएका छन्। यसअघि लगातार तीन खेलमा विकेटविहीन बनेका सन्दीपले तीन खेलमा मात्र विकेट लिन सफल भएका छन्। समग्रमा उनी चार खेलमा विकेटविहीन छन्।
