प्रधानमन्त्री कप टी-२० क्रिकेट प्रतियोगितामा सशस्त्र प्रहरी बलको एपिएफ क्लब र बागमति प्रदेश विजयी भएका छन्।
सोमबार त्रिवि मैदानमा भएको खेलमा एपिएफले प्रदेश २ लाई २४ रनले पराजित गर्यो।
पहिले ब्याटिङ गरेको एपिएफले ५ विकेटको क्षतिमा १६३ रन जोड्यो। एपिएफका लागि ओपनरद्वय प्रदीप ऐरीले ६० रन र आसिफ शेखले ६३ रनको योगदान गरे।
प्रदीपले ४८ बलमा ९ चौका र आसिफले ४५ बलमा ३ चौका र ५ छक्का प्रहार गरे। दुईबीच पहिलो विकेटका लागि १४.२ ओभरमा १२० रनको साझेदारी भएको थियो। आसिफ प्लेयर अफ दि म्याच भए।
त्यसपछि सन्दीप जोराले १७ रनको योगदान दिए। बलिङमा प्रदेश २ का रूपेश सिंहले ४ विकेट लिए। उनले ४ ओभरमा २५ रन खर्चिए।
१६४ रनको लक्ष्य पछ्याएको प्रदेश २ ले ९ विकेटको क्षतिमा १३९ रन जोड्यो।
प्रदेश २ का लागि हरिशंकर साहले ३६ रन र अदिल अलामले १४ बलमा २ चौका र ४ छक्का प्रहार गर्दै ३५ रन जोडे।
बलिङमा एपिएफका कमलसिंह ऐरी, अभिनास बोहरा र भुवन कार्कीले २-२ विकेट लिए।
यता मुलपानीमा भएको खेलमा बागमतिले लुम्बिनी प्रदेशलाई ४९ रनले पराजित गर्यो।
पहिले ब्याटिङ गरेको बागमतिले ७ विकेटको क्षतिमा ११४ रन जोड्यो। उसका लागि सुवास खकुरेलले ५१ रन र कप्तान ज्ञानेन्द्र मल्लले १९ रन जोडे। खकुरेल प्लेयर अफ दि म्याच भए।
बलिङमा लुम्बिनीका दुर्गेश गुप्ता र अनिल खरेलले २-२ विकेट लिए।
११५ रनको लक्ष्य पछ्याएको लुम्बिनी १५.४ ओभरमा ६५ रनमै अलआउट भयो। लुम्बिनीका लागि कप्तान कृष्ण केसीले सबैभन्दा बढी १५ रन जोडे।
बलिङमा बागमतिका नन्दन यादवले ३ विकेट लिए। रामनरेश गिरी, सुवास खत्री र तिलक भण्डारीले २-२ विकेट लिन सफल भए।