नेपाल क्रिकेट संघ (क्यान) ले भारतका राघुराम श्रीनिवासलाई फिल्डिङ कन्सल्ट्यान्ट प्रशिक्षक नियुक्त गरेको छ।
लेभल-३ सिए हाइ पर्फमेन्स प्रशिक्षक राघुराम टी-२० विश्वकपको छनोटका लागि फिल्डिङ प्रशिक्षक नियुक्त भएका हुन्।
नेपालले आगामी महिना ओमानमा आइसिसी टी-२० विश्वकप २०२२ को विश्व छनोट खेल्दैछ। त्यसअघि नेपालले ओमानमै चार देश सम्मिलित टी-२० सिरिज खेल्नेछ।
श्रीनिवास नेपालले त्रिवि मैदान कीर्तिपुरमा गरिरहेको प्रशिक्षणमा काम थालिसकेका छन्। श्रीनिवास नेपालको फिल्डिङ प्रशिक्षक नियुक्त भएपछि प्रमुख प्रशिक्षक पुबुदु दासानायकेले खुसी व्यक्त गरेका छन्।
‘प्रशिक्षक रघुले अमेरिकामा मसँगै काम गरेका थिए। उहाँ एक धेरै ऊर्जावान फिल्डिङ कोच हुनुहुन्छ, जसले नेपाली टोलीमा खड्किरहेको अभावमा केही क्षेत्रहरू पूरा गर्न सक्छ। छोटो सूचनामा आफ्नो बहुमूल्य समय दिनु भएकोमा म उहाँप्रति आभारी छु,’ दासानायकेले भने।
टी-२० विश्वकपअन्तर्गत समूह ‘ए’ को छनोट प्रतियोगिता आगामी फागुन ६ गतेदेखि ओमानमा हुँदैछ।
समूह ‘ए’ मा नेपाल र आयोजक ओमानसहित बहराइन, क्यानडा, जर्मनी, आयरल्यान्ड, फिलिपिन्स र युएई गरी आठ टिम रहेका छन्।
समूह ‘ए’ लाई पनि समूह १ र समूह २ मा विभाजन गरिएको छ।
समूह १ मा नेपाल, ओमान, फिलिपिन्स र क्यानडा छन्। समूह २ मा बहराइन, जर्मनी, आयरल्यानड र युएई रहेका छ्न्।
समूह १ र २ का शीर्ष २-२ टिम सेमिफाइनल पुग्नेछन्। फाइनल पुग्ने दुई टिमले यहि वर्षको अन्त्यमा अस्ट्रेलियामा हुने विश्वकपमा स्थान पक्का गर्नेछन्।
नेपालले विश्वकपमा स्थान पक्का गर्न सुरुमा समूह १ को शीर्ष दुईभित्र पर्नु पर्नेछ, त्यसपछि सेमिफाइनलको खेल जिते नेपाल यही वर्षको अन्त्यमा अस्ट्रेलियामा हुने टी-२० विश्वकपमा छनोट हुनेछ।
नेपालको खेल
नेपाल भर्सेस ओमान - ओमान एकेडेमी १- फागुन ६
नेपाल भर्सेस फिलिपिन्स - ओमान एकेडेमी २- फागुन ७
नेपाल भर्सेस क्यानडा - ओमान एकेडेमी १ – फागुन ९
सेमिफाइनल १ र २ – ओमान एकेडेमी २-१ - फागुन १०
फाइनल - ओमान एकेडेमी १ - फागुन १२
नेपालले विश्व छनोटअघि चार देशसम्मितिल टी-२० सिरिज खेल्नेछ। ओमानमा हुने सिरिजमा नेपालसहित युएई, आयरल्यान्ड र घरेलु टिमबीच प्रतिस्पर्धा हुनेछ।
विश्वकपअघि नेपालले तयारीस्वरुप सिरिज खेल्न लागेको हो। सिरिज माघ २८ सुरु भएर फागुन २ मा सकिनेछ। नेपालले पहिलो खेल माघ २८ मा ओमान, दोस्रो खेल माघ २९ मा युएई र तेस्रो खेल फागुन २ मा आयरल्यान्डसँग खेल्नेछ।
हाल नेपाली टिमले स्वदेशमै अन्तिम तयारी गरिरहेको छ। नेपाल माघ २६ मा ओमान जाने कार्यक्रम रहेको छ।
नेपाली टिम
सन्दीप लामिछाने, कुशल भुर्तेल, आसिफ शेख, दीपेन्द्रसिंह ऐरी, ज्ञानेन्द्र मल्ल, शरद भेषावकर, आरिफ शेख, करण केसी, जितेन्द्र मुखिया, अभिनास बोहरा, साहब अलाम, कुशल मल्ल, कमलसिंह ऐरी, विवेक यादव, प्रदीप ऐरी, लोकेश बम।
