नेपाली राष्ट्रिय क्रिकेट टिमका कप्तान सन्दीप लामिछानेसहितका क्रिकेटरहरू कोरोना संक्रमित भएका छन्।
कप्तान सन्दीपले आफू चार दिनदेखि आइसोलेसनमा बसेको बताएका छन्। सोमबार नेपाल क्रिकेट संघ (क्यान) ले गरेको भर्चुअल अन्तरक्रियामा सन्दीपले आफूलाई कोरोना लागेको बताएका हुन्।
‘चार दिनदेखि आइसोलेसनमा बसेको छु। टिमका अरू चार-पाँच जना खेलाडी पनि संक्रमित भएका छन्,’ उनले भने।
कोरोना संक्रमित भएका अन्य खेलाडीको नाम भने उनले खुलाएनन्।
गत साता अस्ट्रेलियाको बिग ब्यास लिग खेलेर स्वदेश फर्किएपछि सन्दीप तीन दिन अभ्यासमा गएका थिए। त्यसपछि उनी कोरोना संक्रमित भएका थिए।
उनले विश्वकप छनोटअघि कोरोना संक्रमित भएकाले केही सजिलो भएको बताए।
‘ओमान जानुअघि सबै खेलाडी निको भइसक्नुहुन्छ होला,’ उनले भने।
केही दिन अभ्यास रोकेको नेपाली टिमले सोमबारदेखि भने फेरि अभ्यास सुचारू गरेको छ।
टी-२० विश्वकपअन्तर्गत समूह ‘ए’ को छनोट प्रतियोगिता आगामी फागुन ६ गतेदेखि ओमानमा हुँदैछ।
समूह ‘ए’ मा नेपाल र आयोजक ओमानसहित बहराइन, क्यानडा, जर्मनी, आयरल्यान्ड, फिलिपिन्स र युएई गरी आठ टिम रहेका छन्।
समूह ‘ए’ लाई पनि समूह १ र समूह २ मा विभाजन गरिएको छ।
समूह १ मा नेपाल, ओमान, फिलिपिन्स र क्यानडा छन्। समूह २ मा बहराइन, जर्मनी, आयरल्यानड र युएई रहेका छ्न्।
समूह १ र २ का शीर्ष २-२ टिम सेमिफाइनल पुग्नेछन्। फाइनल पुग्ने दुई टिमले यहि वर्षको अन्त्यमा अस्ट्रेलियामा हुने विश्वकपमा स्थान पक्का गर्नेछन्।
नेपालले विश्वकपमा स्थान पक्का गर्न सुरुमा समूह १ को शीर्ष दुईभित्र पर्नु पर्नेछ, त्यसपछि सेमिफाइनलको खेल जिते नेपाल यही वर्षको अन्त्यमा अस्ट्रेलियामा हुने टी-२० विश्वकपमा छनोट हुनेछ।
नेपालको खेल
नेपाल भर्सेस ओमान - ओमान एकेडेमी १- फागुन ६
नेपाल भर्सेस फिलिपिन्स - ओमान एकेडेमी २- फागुन ७
नेपाल भर्सेस क्यानडा - ओमान एकेडेमी १ – फागुन ९
सेमिफाइनल १ र २ – ओमान एकेडेमी २-१ - फागुन १०
फाइनल - ओमान एकेडेमी १ - फागुन १२
नेपालले विश्व छनोटअघि चार देशसम्मितिल टी-२० सिरिज खेल्नेछ। ओमानमा हुने सिरिजमा नेपालसहित युएई, आयरल्यान्ड र घरेलु टिमबीच प्रतिस्पर्धा हुनेछ।
विश्वकपअघि नेपालले तयारीस्वरुप सिरिज खेल्न लागेको हो। सिरिज माघ २८ सुरु भएर फागुन २ मा सकिनेछ। नेपालले पहिलो खेल माघ २८ मा ओमान, दोस्रो खेल माघ २९ मा युएई र तेस्रो खेल फागुन २ मा आयरल्यान्डसँग खेल्नेछ।
हाल नेपाली टिमले स्वदेशमै अन्तिम तयारी गरिरहेको छ। नेपाल माघ २६ मा ओमान जाने कार्यक्रम रहेको छ।
नेपाली टिम
सन्दीप लामिछाने, कुशल भुर्तेल, आसिफ शेख, दीपेन्द्रसिंह ऐरी, ज्ञानेन्द्र मल्ल, शरद भेषावकर, आरिफ शेख, करण केसी, जितेन्द्र मुखिया, अभिनास बोहरा, साहब अलाम, कुशल मल्ल, कमलसिंह ऐरी, विवेक यादव, प्रदीप ऐरी, लोकेश बम।
