वेष्ट इण्डिजविरूद्ध तीन खेलको एकदिवसीय सिरिज भारतले क्लिन स्विप गरेको छ। तेस्रो तथा अन्तिम खेलमा शुक्रबार वेष्ट इण्डिजलाई ९६ रनले हराउँदै भारतले सिरिज ३–० ले जितेको हो।
यो सँगै भारतले पहिलोपटक वेष्ट इण्डिजमाथि वानडे सिरिज क्लिन स्विप गरेको हो ।
सिरिजको अन्तिम खेलमा भारतले दिएको २६६ रनको लक्ष्य पछ्याएको वेष्ट इण्डिज ३७.१ ओभरमा सबै विकेट गुमाएर १६९ रनमा समेटियो। उसका लागि ओडेन स्मिथले ३६, कप्तान निकोलस पूरनले ३४, अल्जारी जोसेफले २९, डारेन ब्रावोले १९, ब्रेण्डन किंग्सले १४ र हेडन वाल्सले १३ रन बनाए । अन्यले दोहोरो अंकमा रन बनाउन सकेनन्।
पाहुना टोलीलाई सस्तैमा रोक्न भारतका प्रसिद्ध कृष्णा र मोहम्मद सिराजले तीन-तीन तथा दीपक चाहर र कुलदीप यादवले दुई-दुई विकेट लिए।
त्यसअघि, अहमदाबादस्थित नरेन्द्र मोदी रंगशालामा टस जितेर पहिला ब्याटिङ रोजेको भारतले निर्धारित ५० ओभरमा सबै विकेट गुमाएर २६५ रन बनायो।
उसका लागि श्रेयस अय्यर र ऋषभ पन्तले अर्धशतकीय पारी खेले। अय्यरले १११ बलमा ९ चौकासहित ८० रन बनाए। पन्तले ५४ बलमा एक छक्का र ६ चौकासहित ५६ रनको योगदान दिए।
दीपक चाहर ३८, वासिङ्टन सुन्दर ३३, कप्तान रोहित शर्मा १३ र शिखर धवनले १० रन बनाए। बाँकी खेलाडीले दोहोरो अंकमा रन बनाउन सकेनन्। जसमा सूर्यकुमार यादव ६, कूलदीप यादव ५ र मोहम्मद सिराज ४ रनमा आउट हुँदा पूर्वकप्तान विराट कोहली शून्यमै डगआउट भए।
वेष्ट इण्डिजका जेसन होल्डरले सर्वाधिक ४ विकेट लिए। त्यस्तै, हेडन वाल्स जूनियर र अल्जारी जोसेफ दुई-दुई तथा ओडेन स्मिथ र फाबियन आलेनले एक-एक विकेट हात पारे।
वानडेपछि अब वेष्ट इण्डिज र भारतबीच तीन खेलको टी–२० सिरिज हुने भएको छ। सिरिज बुधबारबाट सुरू हुनेछ।