नेपाल, मलेसिया र पपुवा न्युगिनी (पिएनजी) बीचको त्रिकोणात्मक टी-२० अन्तर्राष्ट्रिय सिरिजमा नेपालले आज आफ्नो दोस्रो खेल खेल्दैछ।
नेपालले आज मध्यान्ह १२:३० देखि सुरू हुने खेलमा मलेसियासँग प्रतिस्पर्धा गर्नेछ।
सिरिजमा दुवै टिमले सुरुवाती खेलमा जित निकालेका थिए। नेपालले सोमबार भएको खेलमा पिएनजी र मलेसियाले मंगलबार भएको खेलमा पिएनजीलाई नै पराजित गरेका थिए।
टी-२० अन्तर्राष्ट्रियमा नेपाल र मलेसियाबीच अहिलेसम्म पाँच पटक प्रतिस्पर्धा भएको छ। पाँच मध्ये नेपाल चार खेलमा विजयी भएको छ।
पछिल्लो पटक नेपाल र मलेसियाबीच गत वर्ष त्रिवि मैदानमा भएको त्रिकोणात्मक सिरिजमा प्रतिस्पर्धा भएको थियो। जसमा नेपाल दुवै खेलमा विजयी भएको थियो।
पहिलो खेलमा नेपाल ९ विकेटले विजयी हुँदा दोस्रो खेलमा नेपालले ६९ रनको जित निकालेको थियो। दोस्रो खेलमा पहिले ब्याटिङ गरेको नेपालले मलेसियाविरूद्ध २१७ रन जोडेको थियो।
