भारतको उत्तर प्रदेश-११ लाई हराउदै मलेसिया-११ नेपाल भैरहवामा जारी प्रो क्लव च्याम्पियनसिपको फाइनलमा प्रवेश गरेको छ।
वर्षाले प्रभावित ५ ओभरमा छोट्याइएको बिहिबारको पहिलो सेमिफाइनलमा उत्तर प्रदेशलाई १४ रनले हराउँदै उपाधि नजिक पुगेको हो।
भैरहवाको सिदार्थ क्रिकेट रंगशालामा टस हारेर पहिले ब्याटिङको निम्तो पाएको मलेसिया-११ ले तीन विकेट गुमाउँदै ४४ रन बनाएको थियो।
मलेसियाका लागि ओपनर बिरन्दिप सिंहले अविजित २० रन बनाए भने अर्का ओपनर सेइल अजिजले २३ रन जोडे। मलेसियाका तीन ब्याटर एकै ओभरमा आउट भएका थिए।
बलिङमा उत्तर प्रदेश -११ का राज यादवले तीनै विकेट लिए ।
जवाफमा उत्तर प्रदेश-११ ले पाँच ओभरमा चार विकेट गुमाउँदै ३० रनमा रोकियो।
उसका लागि शुभंम चौधरीले सर्वाधिक ११ तथा राज यादवले ६ रन जोडे। बलिङमा मलेसिया-११ का बिरन्दिप सिंहले दुई विकेट लिए।
अब उपाधिका लागि मलेसिया ११ ले आर्मी र घरेलु टोली रूपन्देही ११ को विजेतासँग खेल्नेछ।
