आइपिएल २०२२ अन्तर्गत रोयल च्यालेन्जर्स बैंग्लोरका ब्याट्सम्यान विराट कोहली आइतबारको खेलमा ‘रोयल डक’ भएका छन्।
सनाइराजर्स हैदरावादविरूद्धको खेलमा टस जितेर पहिले ब्याटिङ गरेको बैंग्लोरका ओपनर कोहली इनिङ्ग्सको पहिलो बलमै आउट भएका हुन्।
बिबिसीका अनुसार क्रिकेटमा पहिलो इनिङ्ग्सको पहिलो बलमा आउट हुँदा त्यसलाई 'प्लाटिनम वा रोयल डक' भनिन्छ।
खेलमा कोहली हैदरावादका जगदिश सुचिथको बलमा केन विलियमसनबाट समातिएका थिए।
कोहली यो सिजन डक आउट भएको तेस्रो पटक हो। यसअघि कोहली लखनउ सुपरजाइन्ट र हैदरावादविरूद्ध डक आउट भएका थिए। सिजनमा उनलाई हैदरावादले दोस्रो पटक डकआउट गर्न सफल भयो।
सिजनमा कोहलीले एक पटक मात्र अर्धशतक प्रहार गर्न सफल भएका छन्। उनले गुजरात टाइन्टविरूद्ध ५८ रन जोडेका थिए।
जारी सिजनमा बैंग्लोर ११ खेलबाट १२ अंक जोड्दै चौथो स्थानमा छ। हैदरावाद १० खेलबाट १० अंक जोड्दै छैटौं स्थानमा छ।
