इंग्ल्यान्डले एकदिवसीय अन्तर्राष्ट्रिय खेलको एक इनिङ्ग्समा सर्वाधिक स्कोरको विश्वकीर्तिमान बनाएको छ।
शुक्रबार नेदरल्यान्डविरूद्ध टस हारेर पहिले ब्याटिङ गरेको इंग्ल्यान्डले ४ विकेटको क्षतिमा ४९८ रन जोडेको हो।
यो एकदिवसीय खेलमा अहिलेसम्मकै उच्च स्कोर हो। इंग्ल्यान्डले आफ्नै कीर्तिमान भंग गरेको हो। यसअघि उसले २०१८ मा अस्ट्रेलियाविरूद्ध ४८१ रन जोडेको थियो।
शुक्रबार घरेलु टोली नेदरल्यान्ड्सविरुद्ध इंग्ल्यान्डका लागि तीन ब्याटरले शतक हिर्काए।
फिल साल्टले १२२ रन, डविड मलानले १२५ रन र जोस बटलरले नटआउट १६२ रन जोडेका थिए।
१७ बलमा अर्धशतक प्रहार गरेका लियाम लिभिङस्टोनले नटआउट ६६ रन जोडे।
साल्टले ९३ बलमा १४ चौका र ३ छक्का, मलानले १०९ बलमा ९ चौका र ३ छक्का र बटलरले ७० बलमा ७ चौका र १४ छक्का प्रहार गरे।
यस्तै लिभिङस्टोनले २२ बलमा समान ६ चौका र ६ छक्का हिर्काए।
