आइसिसी विश्वकप क्रिकेट लिग-२ अन्तर्गत स्कटल्यान्ड, नेपाल र नामिबियाबीचको त्रिकोणात्मक एकदिवसीय सिरिजमा नेपालले आज आफ्नो अन्तिम खेल खेल्दैछ।
दिउँस पौने चार बजे हुने खेलमा नेपालले घरेलु टिम स्कटल्यान्डसँग प्रतिस्पर्धा लागेको हो।
यसअघि नेपालले सिरिजमा खेलेका तीन मध्ये दुई खेलमा पराजय भोगेको थियो। नामिबियाविरूद्धका दुवै खेलमा हार बेहोरेको नेपालले स्कटल्यान्डलाई भने पराजित गरेको थियो।
आज घरेलु टिमलाई पराजित गर्न सके नेपालले अंक तालिकामा नामिबियालाई पछि पार्नेछ।
नामिबियाविरूद्धका दुवै खेलमा खराब ब्याटिङ गरेको नेपालका लागि आज पनि मुख्य चुनौती ब्याटिङ नै हुनेछ।
नामिबियासँग पराजित भएसँगै नेपाल लिग-२ को अंक तालिकामा छैटौं स्थानमा झरेको छ। नेपालको १९ खेलबाट १७ अंक छ। १८ खेलबाट १८ अंक जोडेको नामिबिया पाँचौ स्थानमा छ।
७ देश सम्मिलित लिग-२ मा ४४ अंकसहित ओमान शीर्ष स्थानमा छ। ओमानले लिग-२ अन्तर्गतका सबै खेल खेलिसकेको छ।
२३ खेलबाट ३२ अंकसहित स्कटल्याण्ड दोस्रो, २२ खेलबाट २६ अंक जोड्दै यूएई तेस्रो, २४ खेलबाट २३ अंकसहित अमेरिका चौथो स्थानमा छन्।
२० खेलबाट २ अंक जोडेको पपुवा न्युगिनी सातौं स्थानमा छ।
