एसियाली क्रिकेट काउन्सिल (एसिसी) ले युएईमा एसिया कप आयोजना गर्ने भएको छ। यसअघि श्रीलंकामा गर्ने भनिएको प्रतियोगिता युएईमा सारिएको हो।
मूल आयोजक श्रीलंकासँग आयोजना गर्ने अधिकार सुनिश्चित गर्दै युएईमा सारिएको हो।
श्रीलंकामा आर्थिक संकटका कारण एसिया कप देश बाहिर सरेको देखिए पनि श्रीलंकाले आयोजकको अधिकार कायम राख्नेछ। प्रतियोगिता अब अगस्ट २७ देखि सेप्टेम्बर ११ सम्म युएईमा हुनेछ।
‘श्रीलंकामा एसिया कप आयोजना गर्न सबै प्रयास गरिएको थियो र धेरै विचार-विमर्शपछि स्थान युएईमा सार्ने निर्णय गरिएको छ’ एसीसीका अध्यक्ष जय शाहले बुधबार एक प्रेस विज्ञप्ति जारी गर्दै भने, ‘यूएई नयाँ स्थान हुनेछ जबकि श्रीलंकाले होस्टिंग अधिकार कायम राख्नेछ।’
‘एसिया कपको यो संस्करण अत्यन्त महत्त्वपूर्ण छ किनकि यसले एसियाली राष्ट्रहरूलाई आईसीसी विश्वकपको तयारी गर्न मद्दत गर्नेछ। क्रिकट श्रीलंका र एमिरेट्स क्रिकेट बोर्डलाई उनीहरूको समझदारी र सहयोगको लागि धन्यवाद दिन्छु।’
एसीसीले विज्ञप्तिमा श्रीलंका क्रिकेटसँग आफ्नो ऐक्यबद्धता पनि व्यक्त गरेको छ।
सन् २०१८ मा अन्तिम पटक खेलिएको एसिया कप टी–२० ढाँचामा खेलाइने छ, जसमा ९ टोलीको सहभागिता रहनेछ। यूएई, कुवेत, सिंगापुर र हङकङसहित भारत, पाकिस्तान, श्रीलंका, अफगानिस्तान र बंगलादेशले प्रतियोगितामा प्रतिस्पर्धा गर्नेछन्।
श्रीलंकाले हाल पाकिस्तानको आयोजना गरिरहेको र हालै अष्ट्रेलियाविरुद्धको घरेलु सिरिज सफलतापूर्वक सम्पन्न गरेको अवस्थामा नौ टोलीको प्रतियोगिताले वर्तमान परिदृश्यमा ठूलो चुनौती खडा गरेको छ। यूएई प्रमुख प्रतियोगिताहरू आयोजना गर्नको लागि एक अनुकूल ब्याकअप देश भएको छ, भारतमा हुने तय २०२१ को टी-२० विश्व कप युएईमा भएको थियो।
