नेपाल र केन्याबीचको निर्णायक तथा पाँचौ टी-२० खेलमा नेपालले टस जितेर ब्याटिङ रोजेको छ।
केन्याको नैरोबीस्थित जिमखाना मैदानमा हुने खेलमा नेपाली टिममा दुई परिवर्तन गरिएको छ।
विवेक यादव र बसिर अमहेदले टिममा स्थान पाउँदा आरिफ शेख र शाहब आलम बाहिरिएका छन्।
नेपाली टिम : सन्दीप लामिछाने (कप्तान), अर्जुन साउद (विकेटकिपर), दीपेन्द्रसिंह ऐरी, रोहितकुमार पौडेल, विवेक यादव, ज्ञानेन्द्र मल्ल, सोमपाल कामी, करण केसी, बसिर अहमेद, पवन सर्राफ, आदिल अन्सारी
पाँच खेलको सिरिजमा २-२ को बराबरी भएको अवस्थामा आजको खेल जित्ने टिमले सिरिज आफ्नो पक्षमा पार्नेछ।
यसअघि नेपालले पहिलो टी-२० मा ५ विकेट र तेस्रो टी-२० मा ४ विकेटको जित निकालेको थियो।
दोस्रो टी-२० माे केन्या १८ रनले विजयी हुँदा हिजो भएको चौथो टी-२० मा उसले ७ रनको जित निकालेको थियो।
नेपालले हार बेहोरेका दुवै टी-२० मा खराब ब्याटिङ गरेको थियो। दोस्रो टी-२० मा नेपालले १३३ रनको लक्ष्य पूरा गर्न नसक्दा चौथो टी-२० मा १०२ रनको लक्ष्य पार गर्न सकेन।
टी-२० सिरिज खेलिसकेपछि नेपालले तीन एकदिवसीय सिरिज खेल्नेछ। नेपालले पहिलो खेल भदौ १७ गते खेल्नेछ भने दोस्रो खेल भदौ १८ गते तथा तेस्रो तथा सिरिजको अन्तिम खेल भदौ २० गते हुनेछ।
