नेपाली राष्ट्रिय क्रिकेट टिमका पूर्वकप्तान पारस खड्का लिजेन्ड्स लिग क्रिकेटका लागि एसियन लायन्ससँग आबद्ध भएका छन्।
एसियन लायन्स, वर्ल्ड जाइन्ट्स र इन्डिया महाराजार्सबीच प्रतिस्पर्धा हुने प्रतियोगिता आगामी २७ फेब्रुअरीदेखि ८ मार्चसम्म कतारमा हुनेछ।
विभिन्न देशका पूर्वक्रिकेटरलाई आबद्ध गराएर खेलाइने प्रतियोगिताको यो वर्ष तेस्रो संस्करण हुँदैछ।
पारस सम्मिलित टिममा पाकिस्तानका पूर्व खेलाडीद्वय शोएब अख्तर र मोहमद हफिज पनि छन्। यस्तै यो टिममा श्रीलंकाका थिसारा परेरा पनि रहेका छन्।
यसअघि टिममा उपुल थारांगा, अस्घर अफगान, शाहिद अफ्रिदी, मुथैया मुरलीधरन र मिस्वाह उलहक आबद्ध भएका थिए।
प्रतियोगिता टी-२० फर्म्याटमा हुनेछ।
