नाबालिक बलात्कार अभियुक्त सन्दीप लामिछानेलाई नेपाली राष्ट्रिय क्रिकेट टिममा राखिएको र उनको कानुनी स्थितिबारे आफूहरू सचेत रहेको क्रिकेट स्कटल्यान्डले जनाएको छ। यस्तै क्रिकेट नामिबियाले पनि सबै प्रकारका दुर्व्यवहार र लैङ्गिक हिंसाविरुद्ध रहेको बताएको छ।*
क्रिकेट सम्बन्धि समाचार पोर्टल क्रिकइन्फोमा प्रकासित समाचारअनुसार सन्दीपलाई टिममा राख्ने वा नराख्ने नेपाल क्रिकेट संघ (क्यान) र आइसिसीले विचार गर्नु पर्ने विषय भएको क्रिकेट स्कटल्यान्ड र क्रिकेट नामिबयाले बताएका छन्।
आइसिसी विश्वकप लिग-२ अन्तर्गत नेपाल, नामिबिया र स्कटल्यान्डबीचको त्रिकोणात्मक एकदिवसीय सिरिज आगामी फागुन २ देखि कीर्तिपुरस्थिति त्रिवि मैदानमा हुँदैछ।
सो सिरिजका लागि सन्दीप १४ जनाको अन्तिम टिममा परेका समेत क्रिकइन्फोले जनाएको छ। आइसिसीमा दर्ताका लागि पठाइएको १४ जना नेपाली खेलाडीको सूचीमा सन्दीप पनि समावेश छन्। यद्यपी क्यानले औपचारिक रूपमा नेपालको अन्तिम टिम घोषणा गर्न बाँकी छ।
गत भदौमा नाबालिक बलात्कारको अभियोग लागेपछि निलम्बित सन्दीपलाई दुई साताअघि क्यानको बोर्ड बैठकले निलम्बन फुकुवा गरेको थियो। जिल्ला अदालत काठमाडौंमा मुद्दा चलिरहे पनि सन्दीपलाई थुनामुक्त गरेर अनुसन्धान गर्न उच्च अदालतले आदेश दिएपछि सन्दीप २० लाख धरौटी बुझाएर थुना मुक्त भएका थिए। यद्यपी उनलाई देशबहिर जान प्रतिबन्ध छ भने काठमाडौं बाहिर जान अनुमति लिन पर्छ।
मुद्दा चलिरहेको अभियुक्तलाई राष्ट्रिय टिममा स्थान दिएको भन्दै विरोध भएपछि क्रिकेट स्कटल्यान्डलाई पनि यसबारे प्रश्न गरिएको थियो।
जसमा क्रिकेट स्कटल्यान्डले आफ्नो धारणा सार्वजनिक गरेको हो।
'क्रिकेट स्कटल्यान्ड आगामी आइसिसी क्रिकेट विश्वकप लिग-२ अघि नेपालका सन्दीप लामिछानेको कानुनी स्थितिको बारेमा आएका रिपोर्टहरूबारे सचेत छ,' क्रिकेट स्कटल्यान्डको भनाइ छ, 'प्रशासनिक निकायको रूपमा, एक टोलीको रूपमा क्रिकेट स्कटल्यान्ड सबै प्रकारका दुर्व्यवहारहरूविरूद्ध दृढ रूपमा खडा छ, जसको आधुनिक समाजमा कुनै स्थान छैन।'
साथै क्रिकेट स्कटल्यान्डले अघि भनेको छ, 'यी खेलहरूमा खेलाडीको उपलब्धता नेपाल क्रिकेट संघ र आइसिसीले विचार गर्नुपर्ने विषय हो।'
नामिबियाले पनि सन्दीपलाई टिममा राख्ने विषय क्यान र आइसिसीको भएको जनाएको छ। नामिबियाको क्रिकेट बोर्डले भनेको छ, 'क्रिकेट नामिबियाले सबै प्रकारका लैङ्गिक हिंसा, भेदभाव र दुर्व्यवहारको कडा विरोध गर्दछ।'
*अपडेट गरिएको
