आइसिसी विश्वकप लिग-२ अन्तर्गत युएईविरुद्ध नेपालले ६ विकेट गुमाएको छ।
आरिफ शेख ४३ ओभरको दोस्रो बलमा ४३ रन जोडेर आउट भएका छन्। नेपालले १९२ रन बनाएको अवस्थामा आउट भएका उनले ५२ बलमा ५ चौका हिर्काए। यसअघि कप्तान रोहितकुमार पौडेलले अर्धशतक प्रहार गरे।
कीर्तिपुरस्थित त्रिवि मैदानमा टस जितेर पहिले ब्याटिङ गरेको नेपालका लागि रोहितले आठौं अर्धशतक प्रहार गर्दै नेपालबाट सर्वाधिक एक दिवसीय अर्धसतक बनाउने खेलाडी बने।
रोहितले नेपालका लगि एक शतक पनि प्रहार गरेका छन्। रोहित ७७ रन जोडेर आउट भए। उनले ११२ बलमा ९ चौका प्रहार गरे।
त्यसअघि भीम सार्की २९ रन जोडेर आउट भए। उनी ३७ बल ४ चौका प्रहार गर्दै रोहन मुस्ताफको बलमा क्याच भए। उनले चौथो विकेटका लागि कप्तान रोहित पौडेलसँग ५४ रनको साझेदारी गरेका थिए।
यसअघि नेपालले ७.१ ओभरमा तीन विकेट गुमाउँदा २२ रन मात्र जोडेको थियो। ओपनिङ ब्याट्सम्यान आशिफ शून्यमा आउट भएका थिए। उनलाई युएईका आर्यन लक्राले दोस्रो ओभरको पाँचौ बलमा बोल्ड गरे। यस्तै अर्का ओपनर कुशल भुर्तेल ८ रन बनाएर आउट भए।
उनी पाँचौ ओभरको तेस्रो बलमा युएईका आयान खानको डलबिडब्लूको धरापमा परे। यस्तै आठौं ओभरको पहिलो बलमा कुशल मल्ल ९ रनमै आउट भए।
उच्च फर्ममा रहेको नेपालले युएईलाई हराउँदै तालिकाको चौथो स्थानमा उक्लिन चाहन्छ। यो सँगै नेपालले आगमी चार वर्षको लागि ओडिआई मान्यता पक्का गर्नेछ।
सात देश सहभागी विश्वकप लिग टु क्रिकेटमा नेपाल अहिले ३३ खेलबाट ३४ अंक जोडेर पाँचौ स्थानमा रहेको छ। समान खेलबाट ३१ अंक जोडेको युएई छैटौ स्थानमा छ भने ११ अंक जोडेको पीएनजी सातौं स्थानमा रहेको छ।
पहिलो खेलमा पिएनजीसँग पराजित भएको युएईलाई शीर्ष पाँचमा रहँदै ओडिआई मान्यता जोगाउन बाँकी तीनै खेल जित्नुपर्ने हुन्छ।
लिगका पछिल्ला ९ मध्ये ८ खेलमा नेपालले जित हात पारेको छ। घरेलु मैदानमा भएका पछिल्ला पाँच खेलमा नेपाल अपराजित छ।
नेपाललाई सोझै विश्वकप छनोट खेल्न बाँकी तीनै खेल जित्नुपर्ने हुन्छ। युएई भने शीर्ष तीनको दौडबाट बाहिरिसकेको छ।
विश्वकप लिग टु क्रिकेटमा आफ्ना सबै खेल सकाएको स्कटल्याण्ड ५० अंकसहित च्याम्पियन बन्दा ४४ अंकसहित ओमान दोस्रो, ३९ अंक जोडेको नामिबिया तेस्रो स्थानमा छन्। यस्तै ३५ अंक जोडेको अमेरिकाले पनि आफ्ना सबै खेल सकाएको छ।
नेपाल, युएई र पीएनजीबीचको काठमाडौंमा जारी अन्तिम सिरिज पछि चार वर्ष लामो विश्वकप लिग टु क्रिकेट सकिनेछ।
यो प्रतियोगिताको शीर्ष तीनमा पर्ने टोलीले जिम्बाबेमा हुने विश्वकप छनोटमा सोझै पुग्नेछन्। पुछारका चार टिमले क्वालिफायर प्लेअफ खेल्नुपर्नेछ। यस्तै शीर्ष पाँच टिमको एकदिवसीय मान्यता जोगिनेछ।
