नेपाली राष्ट्रिय क्रिकेट टोलीका खेलाडीहरूले ओडिआई वरियता सुधार गरेका छन्। अन्तर्राष्ट्रिय क्रिकेट परिषद् (आइसिसी) ले जारी गरेको नयाँ ओडिआई वरियतामा नेपालका अधिकांश खेलाडीले वरीयता सुधार गरेका हुन्।
ओपनर आसिफ शेख ब्याटिङतर्फ ९ स्थान सुधार गर्दै ६२ औं स्थानमा उक्लिएका छन्। यस्तै कप्तान रोहित पौडेल ५५ औं स्थानमा यथावत छन्।
बलिङतर्फ सन्दीप लामिछानेले दुई स्थान सुधार गर्दै २१ औं स्थानमा उक्लिएका छन्। त्यस्तै सोमपाल कामीले पनि तीन स्थान सुधार गर्दै ६० औं स्थानमा उक्लिएका छन्।
दीपेन्द्रसिंह ऐरीले दुई स्थान सुधार गर्दै ६३ औं स्थानमा पुग्दा करण केसीले तीन स्थान सुधार गर्दै ९५ औं स्थानमा आइपुगेका छन्।
पछिल्लो समय आइसिसी विश्वकप लिग-२ मा सानदार प्रदर्शनपछि नेपाली खेलाडीहरुले वरियतामा सुधार आएको हो।
नेपाली राष्ट्रिय क्रिकेट टोलीले एकदिवसीय अन्तर्राष्ट्रिय वरीयतामा सुधार गरेको छ। आइसिसी क्रिकेट विश्वकप लिग–२ को पछिल्लो समय उत्कृष्ट प्रदर्शन गरेको नेपालले वरीयतामा १६ औं स्थानमा आइपुगेको हो।
अन्तर्राष्ट्रिय क्रिकेट परिषद् (आइसिसी) ले मंगलबार अपडेट गरेको ओडिआईतर्फको वरीयतामा नेपाल १६ औं स्थानमा उक्लिएको हो।
योसँगै नेपालले ओडिआई वरीयतामा नामिबिया, यूएई, अमेरिका र पपुवान्युगिनीलाई पछि पारेको छ।
घरेलु मैदानमा स्कटल्याण्ड र नामिबियासँगको लिग–२ खेल्नुअघि १९ औं स्थानमा रहेको नेपालले त्यसपछिका ११ खेलमा १० जित निकाल्दै आफूलाई तीन स्थान सुधार गरेको हो।
सात राष्ट्र सम्मिलित लिग–२ मा नेपाल ३५ खेलबाट ३८ अंक जोड्दै चौथो स्थानमा छ। लिग–२ मा शीर्ष तीनमा रहेर विश्वकप छनोटमा स्थान बनाउन नेपालले भोलि हुने अन्तिम खेलमा यूएईलाई हराउनुपर्नेछ।
नेपालभन्दा पछि रहेको नामिबिया १७ औं, अमेरिका १८औं, यूएई १९औं र पपुवा न्युगिनी २०औं स्थानमा छन्।
नयाँ ओडिआई वरीयतामा भारत शीर्ष स्थानमा रहँदा अस्ट्रेलिया दोस्रो स्थानमा छ। एसोसिएट राष्ट्रतर्फ स्कटल्याण्ड सबैभन्दा माथि १२औं स्थानमा छ। विश्वकप सुपर लिग खेलिरहेको नेदरल्याण्ड्स १४औं स्थानमा छ। लिग दुईको दोस्रो स्थानमा रहेको ओमान नेपालभन्दा माथि १५ औं स्थानमा छ।
| स्थान | टोली | खेल | अंक | मूल्याङ्कन |
|---|
| १ | भारत | ४४ | ५०१० | ११४ |
| २ | अष्ट्रेलिया | ३२ | ३,५७२ | ११२ |
| ३ | न्युजिल्याण्ड | २९ | ३,२२९ | १११ |
| ४ | इंग्ल्याण्ड | ३६ | ३,९८८ | १११ |
| ५ | पाकिस्तान | २५ | २६४९ | १०६ |
| ६ | दक्षिण अफ्रिका | २७ | २,७७५ | १०३ |
| ७ | बंगलादेश | ३६ | ३,४१५ | ९५ |
| ८ | श्रीलंका | ३४ | २,९७६ | ८८ |
| ९ | अफगानिस्तान | २० | १,४१९ | ७१ |
| १० | वेस्टइन्डिज | ४१ | २,९०२ | ७१ |
| ११ | आयरल्याण्ड | २५ | १,३०० | ५२ |
| १२ | स्कटल्याण्ड | ३५ | १,५६७ | ४५ |
| १३ | जिम्बाब्वे | २८ | १,२०१ | ४३ |
| १४ | नेदरल्याण्ड्स | २१ | ६७३ | ३२ |
| १५ | ओमान | ३० | ९१९ | ३१ |
| १६ | नेपाल | ३९ | १,१६७ | ३० |
| १७ | नामिबिया | ३२ | ९५४ | ३० |
| १८ | संयुक्त राज्य अमेरिका | ३१ | ८२१ | २६ |
| १९ | युएई | ३३ | ६४६ | २० |
| २० | पपुवा न्यू गिनी | ३७ | २६३ | ७ |
